“Kico mi bisa? Despues di cinco aña di investigacion, awo cu ta demostra cu e rapportnan traha pa e hefe di Bureau Criminele Inlichtingen (BCI) di Cuerpo Policial no ta berdad y ta basa riba informacion falso, awo hues-comisario a informa nos diabierna ultimo cu no lo scucha e autor di e rapportnan falso aki mas pasobra su salud no ta permiti”, asina Otmar Oduber a declara na prensa awe.
“Ta increibel cu no lo scucha e testigo principal mas cu a traha e rapportnan falso, siendo cu e persona aki ta crucial, pasobra e sa pakico a traha e shete rapportnan cu a resulta di ta basa 100% riba mentira y redo of si a proposito a laga traha un rapport chupa fo’i nan dede, pa a purba incrimina mi persona”, asina Otmar Oduber a afirma cu un tono basta indigna.
Ta asina cu na luna di juni e interogacionnan mester cuminsa unda lo scucha 31 testigo cu hues a permiti e defensa di Otmar Oduber. Entre esnan mas clave y importante den e caso tin e hefe y funcionarionan di BCI di Cuerpo Policial, Recherchesamenwerkingsteam (RST) di Hulanda y LandsRecherche di Aruba, banda di ex-minister Marisol Tromp cu segun defensa di Otmar Oduber a gaña den declaracionnan of a traha rapportnan cu a resulta evidentemente falso.
E testigo principal y esun cu a traha e shete rapportnan falso lo ta den un estado di salud bastante delicado y despues di cu abogado di defensa di Oduber a pidi pa scucha e persona aki mas trempan cu juni y pa adelanta e interogacion pa e simannan aki mes, hues-comisario a tuma e decision a base di e circunstancia di e polis aki, pa no interoga e persona aki mas.
“Mi ta indigna, rabia y ta sinti cu esaki por a wordo evita si no ta pa e falta di respet y abuso di Ministerio Publico di alarga e caso aki”. Otmar Oduber a sigi bisa cu “ta parce manera cu tin un conspiracion pa scapa cara di Mihisterio Publico pasobra ta imposibel cu desde un aña pasa caba a cera e investigacion y no kier presenta e caso y awo cu hues, desde cuminsamento di november aña pasa, o sea lo a bira ocho luna pasa si ta te na juni lo a bay haci e interogacionnan aki, esaki no lo por tuma luga mas cu e persona principal cu lo mester splica pakico a gaña of traha e rapport falso aki”.
“Pakico tanto tardansa? Pakico mester a warda ocho luna pa cuminsa cu interogacion di e testigonan?” Oduber a mustra un biaha mas riba e echo cu a trapa tur su derechonan durante henter e proceso di e caso aki y ainda Ministerio Publico kier sigui trapa riba su derecho y mas cu tur, riba e berdad, tur djis pa scapa nan cara pero lubidando y ignorando e dolor y inhusticia cu a comete contra su persona.
“Ministerio Publico a faya barbaramente y corte lamentablemente a alarga e sufrimento aki di mas, te na e punto cu awo un di e testigonan principal no lo ta apto mas pa duna su declaracion di pakico a gaña y/of traha e rapportnan falso aki”, y esaki segun Otmar Oduber si ta di condena.
