Den entrevista cu Kevin Eustatia-Palm, UN Youth Representative na Den Haag, Hulanda, e ta comparti cu nos un poco tocante su biahe recientemente na New York unda el a atende un reunion di Nacionnan Uni. Eustatia-Palm ta di Corsou pero ta representa Caribe Hulandes.
E hoben profesional a bay presencia e Youth Forum 2024 y durante conferencia di United Nations, hunto cu Embahador Middelhoff, el a duna un discurso na nomber di Reino Hulandes y caba su discurso cu e palabranan “Masha Danki.” Uzando su propio idioma, na nivelnan mas halto na Nacionnan Uni, ta su manera pa mustra mundo cu nos islanan por ta paisnan chikito pero nos hendenan ta grandi, cu curason gigante y nos hendenan ta yega leu sigur.
E conferencia aki ta unda nan ta toca diferente tema relaciona cu desaroyo sostenibel cual ta e puntonan cu nos mundo a bini hunto na 2015 pa promove un pais mas husto y sostenibel pa futuro generacionnan. “Akinan nos a papia tur cos riba kico ta pasando, unda nos mester bay y kico nos mester haci pa yega caminda nos kier yega.”
E tabata algo unico, un hoben di islanan Caribe Hulandes presente na un tipo di reunion asina. Esaki ta prome biaha cu Eustatia-Palm ta keda eligi pa medio di hobennan den Reino cu un mandato. Esaki ta prome biaha ta vota pa un hende bay eynan y hiba su palabranan. Nacionnan Uni no ta un caminda cu bo ta yega normalmente sin mas tampoco, semper ta sea prome minister of ministernan bo ta yega eynan unda nan ta sigui algun discurso hopi clave. “Mi no por ta eynan sin papia mi mesun idioma na nivel internacional, dus mi a caba mi discurso bisando ‘Masha Danki.’”
Den e proximo aña aki e lo bay haci presencia na varios evento mas awor cu e ta eligi pa dos aña den e funcion aki. Na 2024 tin un cantidad grandi di conferencianan hopi importante pa atende manera Small Island Development States y hopi conferencia mas cu ta importante pa Hulanda y nos islanan den Caribe cu mester yudansa y sosten for di comunidad internacional.
Eustatia-Palm semper ta papia cu hoben cu ta bis’e cu nan tin hopi interes y gana di sa mas den e ramo aki y di politica. “Pero lamentablemente ta algo cu no ta sosode. Si bo bay Nacionnan Uni bo ta pensa ami como hoben nunca por yega eynan, pero si bo pens’e bon tambe ta realidad pasobra nos gobiernonan no ta duna nos chens pa ta eynan mes.” E hoben profesional a menciona tambe cu pa yega akinan bo mester hopi biaha yega via ministernan pero si ta completamente honesto e ministernan aki hopi biaha no sa kico tur ta pasando. “P’esey nos mester di hobennan cu ta pasa den experiencianan tur dia cu sa kico nos mester pa aki 60 aña pasobra con cu bay bin nos si ta na bida aki 60 pa 80 aña anto nan no lamentablemente.”
