E proximo meta di Agenda 2030 ta bay riba e puntonan nr 12, produccion y consumo responsabel y nr 13 e cambio climatico. Na Hulanda, e molinanan di biento ta mata 50 mil parha pa aña y ta un alteracion pa e ecosistema y un molestia pa e habitantenan. Pueblo di San Nicolas, asina hopi partido MEP ta stima boso y kier pone mas molina di biento. E plan di energia sostenibel a fracasa pasobra e ta haci mas daño cu bon. E boeren ta den lucha keto bay pasobra gobierno Hulandes kier kita nan tereno di plantacion y di cria di bestia. E meta tras di esaki ta cu ningun hende por planta ni cria bestia. E ser humano mester bay come carni sintetico, insecto y e cuminda cu e organisacion mundial aki ta produci. E pretexto ta cu stikstof ta malo pa e clima. Union Europeo a introduci un stikstofbelasting. Gobierno kier controla tur cos.
E agenda socialista ta papia di igualdad. Unda e igualdad aki a keda? Socialista di siglo 21 a keda solamente na palabra. Unda cu socialista drenta el a trece desaster. Nos tin ehempel rond di nos. Venezuela, Cuba, Nicaragua, Argentina, China, Chile, Colombia y awor Brazil. Mas bien e paisnan aki a bira comunista y e pueblo ta biba den miseria. Pueblo Colombiano ta prepara un welga general otro luna.
Despues cu partido MEP a hiba un campaña sin medida, awe locual cu nos por mira ta medida y desaster. Nos isla en bes di bay dilanti, a bay atras manera cangreu. Nos grandinan y esunnan cu no tin trabao ta biba den miseria. Nan no por paga pa nan remedinan. Gobierno ta kere cu aumento di pensioen di 36 florin nan por biba cu ne y di otro banda ta ranca mas cu 200 florin cu tur e medidanan. Punto 3 di e metanan di desaroyo sostenibel ta primiti bo “salud y bienestar” y gobierno pa baha gasto ta kita 60 miyon florin pa aña riba salud di nos pueblo for di AZV y ta sconde tras di Hulanda. Esaki ta demostra con hopi gobierno ta stima nos pueblo pero den realidad e ta mata nos pueblo pasobra pueblo no tin placa pa paga pa nan medicamento. E medida den AZV a haci cu nos miho dokter- y enfermeronan ta bandona nos isla. Mesun cos ta pasa den otro departamento. Pueblo mester biba den pobresa mientras ministernan ta core den auto di luho, ta biaha rond di mundo y ta fiesta. Medida pa pueblo y fiesta y luho pa gobierno.
Locual cu ta dilanti porta ta un otro lock down y escasez di cuminda pasobra e paisnan no ta produci cuminda y ta manifesta pa nan libertad. Dia 11 di januari 2023 tur vuelo a cancela na Merca y Canada pa un rato. Inmagina sin vuelo pa un par di dia. Excuus ta e cambio climatico. Kico lo pasa? World Economic Forum ta bay tin un reunion na Davos Suisa e siman nos dilanti. Hulanda ta participa cu 6 minister y premier Rutte ta encabesa e delegacion. WEF a laga sa cu e hackers ta bay ta activo den luna di maart, april y mei 2023. Plan di WEF ta pa crash e economia mundial pa asina nan bin cu e asina yama “Great Rest” y introduci e moneda digital. Tur ATM machine bay down pa un par di dia. Zorg pa bo tin cash den bo saco pa por cumpra locual cu bo mester. E resecion lo por cuminsa den luna di maart y termina te cu den luna di december 2023.
Si dia 4 di september 2016 e Cristiannan a uni den e manifestacion, awe nos no ta den e lucha aki contra di e matrimonio di mesun sexo. Dia 8 di september 2016, Parlamento a pasa e ley sin tene cuenta cu e manifestacion. Gobierno di AVP tabata na mando. Tanto partido MEP, AVP y Democracia Real a vota na fabor. Minister-president e tempo ey a keda keto y bisa cu e no por haci nada? Nos ta corda kico a pasa na Sta Cruz? Awe nos minister-president ta bisa cu mester pidi conseho. Pueblo ta kere den “cuentas de hadas”? No ta nada straño pa nos di partido Curpa pasobra dia 23 di september 2015 partido AVP a bay di acuerdo cu e agenda 2030. Partido MEP a bin den gobierno y tambe a sigui cu e Agenda 2030 aki, p’esey mes dia 17 di december 2020 a join CommonTrust Network y Aruba a bira e prome pais den Caribe. Nos parlamentarionan cu ta bisa di ta Cristian y no ta sali na defensa di pueblo sino ta pidi pueblo pa firma un lista. No ta parlamentarionan ta defensor di pueblo? Tevreden, Berlis y Guedez e poder ta den boso man pa sali defende nos pueblo y no sconde tras di firma. Para pa e palabra di Dios y no sinta man crusa y laga boso gobierno destrui e famia tradicional. Partido Curpa ta e unico partido cu para firme pa e famia tradicional y lo sigui lucha pa e famia. Si como parlamentario boso no haci nada! E ayudo lo bin for di otro caminda. Dios lo hasi algo den e dianan nos dilanti paso tin remanente cu no a dobla pa baal. E huicio di Dios ta na caminda.
Lider di partido Curpa,
Eric Ras
