“Mi conseho na tur hende ta, ora cu tin debe y no por paga, bay bo mes na e instituto financiero, sinta papia, splica bo situacion, haci areglo y cumpli. Keda sin atende y sin enfrenta e debe, ta motibo pa hinca bo den problema so. Pa ora un debe yega na findishi, na beslag of na saca hende di cas, ta pasobra cu mas di 1 aña pasa caba”, asina Edwin Tromp, un cara conoci den e sector financiero di nos pais a comenta. El a duna un conseho general na tur hende cu ta pasando den momentonan dificil financieramente actualmente pa motibo di falta di salario of entrada pa por cumpli cu debe cu banco, hipoteca, huur, etc.
Cu e ultimo desaroyonan rond di e pandemia y crisis economico, e ultimo lunanan por a nota cu e aspectonan financiero ta bao di basta presion. Den esey por haya dado momento cu hendenan no por cumpli cu nan pagonan y ta yega na e extremo den e proceso di cobramento, ora cu instancianan financiero ta bay Corte pa pone beslag of hasta bende propiedad na findishi of saca, desaloha personanan of kita auto of cas for di nan.
Hopi biaha ta haya comentario y hopi hende no ta compronde con e proceso aki ta hinca den otro, pasobra e instancia financiero no por bende cas di un hende of saca hende for di su propiedad of kita un propiedad for di un persona. E ta algo cu no ta e instancia financiero ta haci, pero ta sosode door di un hues di corte, cual proceso por dura largo cu ta desemboca na e parti aki.
Director comercial y tecnico di Fundacion Cas pa Comunidad Arubano (FCCA), Edwin Tromp tin hopi aña den e industria aki y e ta comenta cu como financiado, esta esun cu ta financia e cliente, tin cu tuma su pasonan, pero tambe mester proteha su interesnan. Esey ta pone cu ta yega na papia cu e cliente y ta algo cu no ta bay asina facil tampoco. Mester splica e cliente y tin biaha gui’e. Tin hende ta pone prioridadnan diferente. Tromp ta sigui splica e ora ta papia cu e persona y duna nan tempo. Tin hende ta give up, pero tambe hopi di e cosnan cu Tromp por a mira ta surgi ora cu tin divorcio y ta yega na e extremo cu ta bende.
E situacion actual ta comparabel cu tempo cu Lago a cera
Na aña 1985 Lago a cera y hopi hende a laga nan propiedadnan cu debe of a lanta bay laga debe atras. Esunnan cu debe cu no por cumpli, mescos a pasa e tempo ey, e banconan mester a tuma nan accionnan, proteha nan interesnan y a bay na findishi. Awendia, cu e situacion di pandemia, ta notando e mesun tipo di situacion y presion riba e industria financiero.
Lunanan di gracia
Tin banco of institutonan financiero cu a duna tres luna di gracia, durante di e pandemia, pa loke ta pago di e debenan. Despues a prolong’e cu tres luna mas. Tin banco a adapta e pagonan mensual di clientenan na pago di interes so, specialmente pa esunnan cu no tin entrada.
Edwin Tromp a splica cu ta dificil pa por duna espacio mucho grandi. Pero si papia di FCCA, nan lo cuminsa topa cu problema financiero interno despues di 9 luna sin haya pago di cliente. Awor aki cu ta den pandemia, FCCA tambe a cuminsa pa duna 6 luna. Tin hende cu a bin registra cu nan no por paga. Tin hende cu no a bin registra ni a presenta mes!
Bendemento di propiedad
Proceso di bendemento di propiedad ta simpel. Ora tin debe, e persona indica ta bo mes, segun Tromp. “Abo, cu ta haci e debe, abo tin cu presenta na e instituto cu bo a fia placa fo’i dje. No mester core p’e. Pasobra si core p’e, e no ta bay tampoco. Tur compania, tur banco ta papia cu cliente. Sigur sigur nan ta papia cu e cliente mas biaha. Pero tin hende no ta kere y ta insisti cu nan no ta paga of ta haci areglo cu nan no ta cumpli. Ningun instituto financiero su meta ta pa bende ningun cas di ningun hende. Ningun director cu ta responsabel pa e proceso ey, tampoco no ta nan meta pa bende cas di cliente.
Pero pesey tin condicion. Ta cera un hipoteca y haci pa un notario. Atrabes di e notario, ta skirbi tur e condicionnan. E ora ey si no cumpli ningun instituto financiero no por bay wanta esey”.
