EcoTech a sorprende su cliente nobo ayera, Joraine Simon-Werleman, un docente, cu a bira nan di 6.000 cliente. Den un ambiente festivo y cu pito di truck, e team di EcoTech a yega hunto na cas di Joraine Simon-Werleman pa entreg’e su “toter” nobo cu yen di regalo despues cu el a dicidi di cambia di compania.
Joraine Simon-Werleman ta hopi contento cu su regalo y sorpresa. El a yama EcoTech y e mesun atardi a manda un representante na su cas pa e inscribi pa bira cliente nobo. E no a spera cu un team di EcoTech a presenta na su cas, pero a tende un desordo na momento cu hunto cu su yiunan tabata preparando pa bay come.
“Mi yiu a bisa mi cu e ta tende un truck. Mi a bisa normal no ta dia di servicio”, el a expresa. Ora cu nan a mira tur blaas, el a realisa cu e team di EcoTech a bin na su cas. Claro cu e bishita inespera aki a causa hopi alegria na e cas, pero tambe den henter e bario di Piedra Plat.
Desde basta siman caba e kier a uni na e famia grandi di EcoTech, pero a prefera di warda pa vakantie cuminsa pa regla su cosnan. E tin famia cu ta cu EcoTech y ta masha contento cu e servicio. Su famia a bis’e door cu e tin tanto tempo cu un bari sushi kibra y te ainda nan no a cambi’e, cu miho e cambia pa EcoTech pasobra ey e servicio ta na ora. Esey a pone cu el a dicidi di cambia.
EcoTech ta hopi contento cu e logro di 6000 cliente, asina Chaim Chirino, Operations Manager di Ecotech a expresa. Nan ta hayando acogida grandi, tur dia ta ricibiendo hopi yamada di clientenan potencial. “Un di e servicionan cu EcoTech ta ofrece, cu si bo no por yega cerca nos, nos ta zorg pa yega cerca bo.” E empleadonan di EcoTech ta percura pa yega na unda e persona ta, sea ta na su cas of trabou y facilmente por bira miembro.
“Nos ta gradici Sra. Simon-Werleman pa ta nos di 6000 cliente”, asina Alfredo Ruiz, Assistant Director di Ecotech, a enfatisa cu un sonrisa grandi riba su cara. EcoTech ta un compania cu na aña 2020 lo cumpli 35 aña di existencia. Ta un compania di 90 trahado cu ta traha 24/7 brindando servicio tur dia. EcoTech ta recogiendo 60% di sushi na Aruba. EcoTech a redobla nan cantidad di clientenan den e ultimo lunanan y awor ta na 6000 cliente y ta cla pa e siguiente celebracion….ora nan alcansa e di 7000 mil cliente.
