Existencia di Centro di Observacion den MDC no ta sigura ainda

Recientemente via di un combersacion y Manifiesto Sindicato Empleadonan Publico y Priva (SEPPA) a pone na conocemento di Prome Minister Evelyn Wever Croes tur loke cu nan a bin ta haciendo durante un aña y mey riba e preocupacion di empleadonan di Multidisciplinaire Centrum (MDC).

A haya promesa di e mandatario cu e lo bay traha riba e tema aki y diamars nan a topa cu e Prome Minister pa scucha resultado, despues cu a sinta cu Vice Prome Minister Oduber tambe. E delegacion di SEPPA na final a keda hopi contento pa e intermediacion di e mandatario, mirando cu SEPPA ta sinti cu e direccion na unda kier a hiba MDC ta uno hopi peligroso pa e muchanan cu ta haci uzo di e servicio aki, e mayornan y e docentenan cu ta depende di e trabou cu MDC ta haci.

Magaly Brito di SEPPA: Existencia di Centro di Observacion den MDC no ta sigura ainda

Magaly Brito di SEPPA: Existencia di Centro di Observacion den MDC no ta sigura ainda. Click link pa mas https://24ora.tv/2LZwgmn

Posted by 24ora on Wednesday, July 17, 2019

Den e tempo cu a transcuri a trata di laga e Minister di Enseñansa mes soluciona e problema aki. A sinta cu e mandatario contra boluntad di un grupo di trahadonan, kendenan tin un falta di confiansa cu lo por yega na un solucion. Di otro banda, e grupo tabata kier a spera pa e solucion di Prome Minister como cabes di e Gobierno. Tin algun aspecto cu por bisa, segun Secretaria General di SEPPA Magaly Brito, ta cu nan ta riba e bon caminda, pero e existencia di e Centro di Observacion den MDC no ta sigura ainda. Tin duda kico ta bay pasa cun’e y tambe e parti di “Teacher’s Care”. Otro punto cu a papia cun’e ta e falta di personal na MDC  cu ta stroba su funcionamento y esaki ta debi cu algun personal cu ta na disposicion di un of otro Minister.

Minister di Enseñansa no kier yega e puestonan aki pasobra tin un personeel-stop. SEPPA a  mustra cu prueba cu a constata cu Gobierno a sigui tuma hende, pero cu contracto. P’esey nan pregunta di con no ta yena e espacionan habri na MDC p’asina nan por sigui mehora nan servicio. E titular di enseñansa a manda yama bek esnan cu tabata disposicion di un mandatario y asina mes e servicio ta keda b ay atras. E problema ta cu nan tabatin falta di personal caba.

Den e encuentro cu e Minister di Enseñansa, nan a bisa e mandatario cu no por trata di “klokluiders”, pero sinta na mesa cu e sindicato y papia abiertamente di e problemanan cu por tin. Dialogo ta hopi importante, aunke no semper ta keda cla completamente. Pero dialogo e ultimo añanan a trece trankilidad. Esey ta loke e Minister di Enseñansa mester haci pa evita e problemanan di ultimo aña y mey. “No mester lubida cu MDC a haya sosten di Hulanda y  a prueba su necesidad di existencia.”

Nan ta contento si cu Vice Prome Minister a pone un paro na e personal cu mester a bay entrante prome di augustus, te ora cu bin claridad.

Awo a keda pendiente cu algun punto cu falta contesta riba nan, esta si e mandatario encarga cu enseñansa ta hala atras riba esakinan.