Tur señal cu a ricibi desde cu Enfoke den forma exclusivo a presenta e noticia cu e politico Mike de Meza a haya Cita cu Fiscal (TOM_Zitting), ta cu e lo no acepta e oferta
De Meza no a keda mucho den oficina di Cita cu Fiscal. E tabatin cita pa 2’or di merdia y ya pa 2.15 e tabata pafo. E cara no tabata alegre.
El a haya e invitacion mas o menos dos luna pasa. A yega eynan compaña pa su team di defensa – mr. Desiree Croes, Mr. Emerencia y e hurista Duineveld. Tur tabata comparti e opinion cu loke nan a tende eyden ta duna mas malcontento, pa bis’e di un forma suave. Despues di mas cu un aña di atacha e nomber di de Meza, cu a strob’e di bira minister, di a papia cu el a “ontduik belasting”, a finalisa cu algun cosnan chikito cu no ta bale la pena bay corte y kita tempo di un hues, cu tin casonan grandi y di criminalnan pa atende.
Un “kruisje” marca den hoki robes, entrega papel laat y sin yena nan corectamente ta e sospechonan cu a keda. Esaki lo nifica cu mita di Aruba mester bay cera. Of cu normalmente lo yama e hendenan pa informa cu tin eror. Pero den caso di De Meza, conoci como caso Mero, a dicidi otro.
Sperando asina hopi tempo pa limpia su nomber, ta dificil pa kere cu e lo acepta. Asina mes el a informa OM cu e lo tuma algun dia. Pero por a compronde cu unabes cu el a papia esaki cu famia y su team y a splica nan kico e oferta ta, e reaccionnan tabata unanime “no acepta”. Pero e politico mes no a expresa su mes ainda riba e echo si tin un decision tuma of no.
