E team di recherche ta den ful swing haciendo investigacion pa keda cla cu e caso di asesinato den e hotzone na Palm Beach. Eynan e homber Li-Angelo Robert Rayshen Carmona Alcantara naci Aruba 26 october 2007, alias “Kuki”, ta e sospechoso principal. El a sconde algun dia. Pero na momento cu Cuerpo Policial a manda un mensahe cla pa e mama, e sospechoso mes a yega warda.
Den un investigacion tactico a logra yega tambe na e arma di candela usa den e asesinato. Prome cu e sospechoso principal a entrega su mes, dos otro cu tambe tabata cu ne a entrega nan mes rib’e mesun dia. Awo tin tres detencion cu e arma confisca. Mientras cu ta bezig ta acumula informacion no ta descarta cu por cay mas detencion. Desde cu e caso a sosode ta menciona nomber di un mucha muhe tambe. Ta culp’e di a planea pa yama Rayden Kock bin pafo y asina a topa cu e trio cu cual un di nan a tir’e cu consecuencia fatal. Si den e investigacion por prueba cu e damita aki a haci e acto aki intencionalmente, e lo por haya su mes den problema cu husticia tambe.
Asina ta prematuro ainda pa bisa cu e lo por cay cera. Ta den e proceso di e investacion lo bay conclui esaki. E mesun damita aki tabata den un cas cu pool y e sospechoso cu a mata Rayden Kock tambe tabata t’ey. P’esey riba rednan social ta indica den e discusion cu el a traiciona Rayden dor di yama pafo y ora el a yega pafo e asesino cu dos amigo tabata warda riba dje cu e arma di candela.
