Gobierno tin un sistema di plataforma di siguridad y den e plataforma aki cu ta draai den forma piloto tin den dje e gruponan di hoben cu ta causa mas riesgo den comunidad. Ta bay institui e plataforma aki otro siman oficialmente. E piloto a draai exitosamente, segun minister di husticia, Arthur Dowers.
E mandatario a sigui splica cu den e plataforma aki lo bay haya e parti di hoben, cual ta duna e temanan central. Tin e parti di e personanan cu tin problemanan mental, psicologico y social, cu ta bay wordo atendi cun’e tambe den e planaforma. Tambe ta bay tin High Impact Crimers, esnan cu ta comete crimen di impacto halto, kendenan tambe lo bay haya atencion special.
Otro siman lo bay dedica un conferencia di prensa special na e sey, unda cu lo bay duna mas splicacion riba e tema. Na e momento aki, e forma di traha ta cu ta juist percura pa tur hende. No ta bay hinca tur mucha cu ta biba riba e pais aki, tin un database. Esnan cu ta causa riesgo di criminalidad, ta den un sistema caba. Esnan cu ta core riesgo pa bay den caminda robes, tambe ta den un sistema.
Unico problema cu tin ta, con ta maneha e sistemanan aki. Banda di e sistemanan aki tin por ehempel e fusion center cu a bin cun’e, cu tambe ta un sistema parecido na esaki, caminda cu tin tur e organisacionnan ta trece informacion hunto y e informacion aki ta wordo uza pa atende cu criminalidad.
Banda di Cuerpo Policial, Ministerio Publico, tin por ehempel hasta Kustwacht den dje, Marrecheusse, cu ta dirigi na un forma tempran, señala cierto riesgonan y atende cu nan. E sistemanan aki mester bay perfecciona nan. Tin un sistema di informacion na polis cu ocho aña largo ta luchando cun’e pa perfeccione y ainda no a logra. Pero e sistema ainda ta existi y ta un sistema cu por saca hopi informacion for di dje pa e por traha.
