E malesa ta cuminsa cu un puishi, despues e ta bira un blaar cu awa. Despues e awa ta bira geel/berde scur. Despues e ta forma un casca. Una bes cu e forma un casca, e casca ta cay y e no ta infecta e persona mas.
En general loke tin cu tene na cuenta, ta e complicacionnan. Si e mucha ta tosa continuamente y tin keintura, hib’e dokter mesora.
Dr. Salazar di Departamento di Salud Publico (DVG) a splica cu tin cu hib’e Dokter di cas ora cu e blaarnan sali riba su curpa pa e por haya remedi pa keintura halto, remedi pa hunta riba e blaarnan y pa evita grawatamento. Cu un mucha e blaarnan no ta lag’e drumi y pa un adulto e ta pio. E tin mas complicacion den cuero, mas complicacion den pulmon y tin cu tene cuenta cun’e.
Cu un hende na estado, no mester mishi cu un persona cu tin bruela. Ora e haya infeccion, e baby cu tin den su barica lo por keda afecta.
Bruela ta un enfermedad di mucha berdad. Y si nos sigui recomendacionnan, no lo bay tin complicacion. Fase di alerta ta tosamento, keintura no ta basa. Tres dia despues, e keintura tin cu baha. E ta keda cu su blaar. Ta hunt’e cu crema pa evita grawatamento. Mester evita pa rasca e blaarnan. Den shete dia e lo por bira mas miho y e virus lo bay.
Notificacion di e virus
Departamento di Salud Publico ta wordo notifica door di e dokternan di e situacion. Den e caso aki ta importante, segun dr. Salazar, bruela ta malesa cu mester meld. Ademas ta responsabilidad di dokternan pa meld pa sa con e situacion ta. Den mundo medico, bruela ta un malesa di mucha y cu tur hende ta pasa aden. Pero no mester lubida cu e tin su consecuencianan si nos no tene na cuenta.
Departamento di Salud Publico mas tanto DBZ, mester sa con nos ta bayendo cu e situacion di bruela. No solamente e ta na Aruba, pero tambe den e region di Caribe y Sur America, tin casonan di bruela actualmente. Nos mester vigila pa nos tuma un accion si e lo tin mayor complicacion riba esey.
Mayornan, hendenan cu tin e sintomanan cu keintura halto, blaar, etc., bay dokter di cas. Si e dokter ta notifica, si ta diagnostica bruela, mand’e su notificacion pa departamento di Salud Publico, pasobra mester haci’e un investigacion pa wak cuanto caso, si muchanan, si tin hende na estado, of cual ta e riesgo di hende. Ta importante meld pa asina DVG tuma accion manera debe ser, segun dr. Salazar.
