Un rato pasa a drenta e noticia tristo cu e “primer actor” Venezolano, Raul Jose Amundaray Castro, a fayece na Houston, Texas, na edad di 84 aña. E actor semper tabatin un amor special pa Aruba y a casa cu Omira Habibe, cu kende e tin tres yiu, di cual dos di nan ta bibando aki na Aruba.
Raul di edad hoben a cuminsa su carera na radio como locutor. No a dura mucho cu el a profundisa su mes den e arte di actuacion y a debuta den varios telenovela desde aña 1965 caba.
Na aña 2010 el a logra cura y sali for di peliger di un enfermedad, ora cu a diagnostik’e cu un bacteria intestinal. E ta biba pa un bon tempo caba na Houston y ta sigui den su profesion di profesor di actuacion, na un scol di actuacion cu e mes a funda.
Den su ultimo trabounan ta destaca su participacion den e telenovela “Vieja yo?” na Venevision, den cual el a interpreta e rol di Jose Martinez “Don Pipo”.
Su novelanan cu el a hunga aden ta varios y ta data desde aña 1961 caba cu Cinco Destinos na RCTV, ta inclui Cristal den cual el a interpreta e papel di “ Alejandro Ascanio” na RCTV. Su ultimo novela tabata na aña 2012 ainda, Natalia del Mar, den cual el a interpreta e rol di Monseñor Gomez na Venevision. El a hunga den tres pelicula tambe, dos na Mexico y un na Venezuela. Na tur nos ta conta 33 telenovela cu el a hunga den su carera artistico.
Na su yiunan Raulito, Rodolfo y Omira, ta bay nos palabranan di mas profundo condolencia cu perdida di nan tata stima. Cu Raul sosega na paz den Reino di Señor.