Aruba a bira inpagabel (hyper inflacion style di Venezuela)

5135

“Tur dia bo por tende hende ta keha cu Aruba ta caro. Un realidad cu no por wordo ignora mas”, asina e conocido abogado mr. Ronny Wix a expresa den un opinion riba su pagina di Facebook. Cu su permiso nos ta reproduci e comentario aki, cu e ta expresa a titulo personal.

Dia 31 di december mi a bay come den restaurant cu mi casa. Nos a come 2 appetizer y 2 maincourse. Nos a pidi un botter di biña di e marca Wente (nada special). Despues di dinner nos a bebe 3 glas biña mas y un dessert. E cuenta a sali Awg.540.00! Riba e cuenta nan a pone 15% di service charge cu ta Awg. 81.00 y mas 6% di BBO. Total mas di Awg. 600.00 pa 2 persona.

E prijsnan aki no ta inusual mas na Aruba ya cu casi tur restaurant di un tiki calidad tin e mesun prijsnan. Den e restaurant mas high end e prijsnan ta hasta mas halto. Hasta ora bo bay establicimento mas casual un glas di biña ta costa minimo $10,00 (Awg.18,00). Den e hotelnan e situacion ta mas ridiculo ainda.

Poco poco Aruba ta bezig ta prijs su mes for di e mercado di turista cu por cierto tur dia ta birando mas competitivo. Turistanan di Merca/Canada y Europa tin choice di un scala di destinacion den Caribe y Mexico pa menos di mita di e prijs cu nan lo mester paga pa bin Aruba. Y hopi di e destinacionnan aki tin mes hopi y hasta mas hopi di brinda cu Aruba. No haci e fout di kere cu Aruba ta un lugar unico y special den Caribe. Ta hopi isla mas tin y hopi mas barata.

Pakico e prijsnan ta asina caro? Esey tin diferente factor pero un di e factornan mas grandi ta tur sorto di belasting cu Gobierno ta keda hisa y introduci. Cada vez cu Gobierno hisa un belasting riba e comerciantenan of introduci belasting nobo riba e sector priva, e comerciantenan ta wordo forsa pa ahusta nan prijsnan pa asina nan por survive.

Un ehempel recien di con Gobierno ta crea (hyper) inflacion ta e subida di deviezenrechten cu 50% (1.3% pa 1.9%). Cu e subida aki di deviezenrechten Gobierno a caba di devalua e Florin di Aruba, si esey ta corecto, Florin a devalua. Floring a perde balor contra tur otro moneda na mundo – bo ta paga mas Florin pa e mesun cantidad di por ehempel Dollar of Euro – y esey yama devaluacion.

Hopi hende no ta realisa cu tur cos cu nos come, bebe of uza aki na Aruba ta wordo importa. Ora companianan manera Frasa, Consales, Caribbean Overseas etc. importa nan productonan, nan mester paga cu Dollars of cu Euro y esaki a caba di bira mas caro pasobra awor tur hende mester paga mas Florin pa haña Dollar of Euro. Tremendo manera pa crea inflacion.

Den e mesun siman Gobierno a devalua Florin door di hisa deviezenrechten nan a bira y hisa minimum loon. Bo no mester ta un experto pa realisa cu ora bo hisa minimum loon tambe prijs ta subi paso e doño di trabou ta wordo forsa atrobe pa hisa su prijsnan pa asina e por cumpli cu su empleadonan.

Dos siman despues ta drenta informacion cu Gobierno ta bay hisa invoerrechten cu 6% (nan ta yam’e BBO). Cu otro palabra Gobierno a hisa deviezenrechten, hisa minimum loon y introduci BBO pa importacion. E ultimo aki ta bay tin un multiplier effect hopi progresivo. E tipo di accion nan aki ta loke Venezuela, Cuba y otro pais socialista ta haci pa nan por paga salario di e miles di ambtenaarnan cu nan tin den servicio.

Esaki ta djis tres (3) simpel ehempel den un periodo hopi cortico con Gobierno ta crea hyper inflacion (style di Venezuela cu Argentina) cu hisamento di belasting y minimum loon. Pa mi ta bon cla riba e punto aki, no ta e Gobierno actual so ta culpabel sino tur esunnan prome tambe. Pasobra ta tur ta haci e mesun fout: Nan kier hisa entrada di Gobierno den luga di baha nan gastonan (di personal).

E situacion aki ya no ta sostenibel mas y si no bin cambio drastico y lihe, e futuro di Aruba ta pinta scur y esey ta conta vooral pa e generacion jong cu ta bay hereda un desaster.