Tin algun preocupacion cu OPPA tin. Ivo Valdez, presidente di e organisacionn a splica cu un aña pasa a acerca AZV cu diferente punto di atencion pa locua ta trata cuido general na Aruba y cu ta encera cuido pa nos grandinan tambe.
Despues di un aña a ripara cu practicamente tur e puntonan cu a trece dilanti un aña pasa, tabata keto bay sosodiendo. Miembronan a bin cu diferente keho y OPPA tin cu atende cu nan, pasobra ta nan OPPA ta representa. E aña aki, algun luna pasa a papia cu AZV y a trece e punto di tweede klasse, cu tin derecho riba dje y tambe riba e hecho cu hopi di e miembronan tabata keha tocante ora cu nan famia of un di nan mes cu ta hospitalisa, nan ta pone nan hunto cu hendenan di diferente sexo den e mesun camber.
A atende cu e asunto ey cerca e uitvoeringsorgaan di AZV pasobra tur pensionado di OPPA cu tin derecho riba tweede klasse verpleging ta paga un prima y ta paga e prima di mas halto ainda como pensionado publico. A acerca AZV pasobra ta e compania ey ta representa e pensionadonan cu nan seguro, esta ora cu nan ta paga nan premie na AZV nan ta page, y AZV ta paga hospital, na modo di papia.
A dicidi cu lo bay papia cu e director di e uitvoeringsorgaan, pa atende cu e asuntonan ey. Ora cu a yega eynan, a haya tende cu ta maneho di hospital. A sali no mucho contento for di e reunion y a acerca hospital y a papia cu e director medico di hospital. Director medico di hospital tabata tin comprension pa e puntonan y el a bisa cu te awor aki berdad ta cu no tin klasseverschil mas na hospital, mientras cu nan ta cana rond cu un carnet unda cu nan tin derecho riba un tweede klasseverpleging.
Tocante e asunto di dos persona di diferente sexo den e mesun camber, e director a bisa cu semper nan ta puntra e pashentnan mes cu si e tin algo contra. Aparentemente te ainda esaki ta tumando luga, mientras tanto OPPA a manda un carta pa minister di salubridad, locual te ainda no a haya un contesta, pasobra ta bay pidi’e pa un cita caminda cu por trece nan preocupacion dilanti y tambe peticion di nan miembronan cu ta firmando mientras tanto un carta di protesta tocante di esey.
Nan ta contra pa ora hospitalisa, pa nan ta buta den camber hunto si ta hende muhe, hunto cu un otro homber, of si ta hende homber, hunto cu un hende muhe. E no ta custumber di Aruba pa tin hende homber y hende muhe den e mesun camber na hospital. Tin hopi miembro di OPPA y no miembr, cu nan ta contra. Te awor aki a manda carta pa minister di salubridad publico. Ta siman pasa dialuna el a bay y te ainda no a haya un contesta y ta spera pa haya un contesta pronto riba e asunto ey.
Siman pasa dialuna, a manda tambe un carta pa minister di finansas, pasobra cu for di aña 2017 directiva di OPPA ta purba di haya contacto y sinta na mesa cu minister di finansas pa papia tocante e asina yama indexering di 85 florin cu e pensionadonan mester a haya for di 2013. Lamentablemente tin cu bisa cu te ainda no a logra haya un cita, ni cu e minister di finansas anterior, y tampoco cu e minister di finansas actual.
OPPA a manda un carta siman pasa dialuna. Ta wardando riba un contesta y esey ta e ultimo carta cu directiva di OPPA lo manda pa minister di finansas, e ora lo cuminsa un otro caminda cu no ta e caminda di sinta na mesa. Ta spera cu por haya un cita cu minister di finansas, pasobra a duna tres siman y esey ta unda ta para awor aki. Wardando riba un contesta di dos minister. Uno di salubridad publico y e otro di finansas.
