E hoben P. di 16 aña a presenta diabierna mainta den Corte bou acusacion di intento di asesinato di e homber SMP. E hecho aki a tuma luga dia 10 di februari despues di un parada di carnaval na San Nicolas.
Awo ta resulta cu e mucha homber di inicial P., a bin bisa cu e no ta e persona cu a hinca e homber Haitiano, te cu su tripanan a sali afo. Hopi biaha ora cu acusadonan yega den Corte, nan ta hala atras riba nan declaracion duna inicialmente na Polis.
Loke ta haci e caso aki diferente ta cu Polis tabatin solamente e declaracion di e hoben aki cu ta incrimina su mes. Niun otro declaracion ta mustra cu ta e hoben aki a hinca e homber.
E hoben den Corte a bisa cu el a tene duele di e homber “Jimmy” pasobra e tin yiu. Ademas, nan a priminti di percura p’e, y lo yud’e cu placa. Pero nan no a yud’e ni bishit’e.
E propio victima ta bisa cu esun cu a hinke ta un persona ancra y cu cabey di rastra. E descripcion aki no ta cuadra cu e acusado. Inclusive e victima tabata den Corte y Hues a scuch’e como testigo. Ora cu a puntr’e si e homber sinta su tras ta esun cu a hinca, el a contesta “no”.
Mesora fiscal a lanta para net na momento cu Hues tabata di bay mustra testigo potret di e tal Jimmy pa mira si esey ta e persona cu a hinke. El a pidi Hues pa ordena libertad di e hoben acusado di 16 aña, habri e investigacion di nobo. Y den e investigacion aki mester laga e victima señala entre un serie di potret kende ta esun cu a hinke.
Hues a bay di acuerdo cu e peticion di Fiscal, y a ordena libertad inmediato di e hoben aki. El a bis’e tambe pa nunca mas haci algo asina, esta tuma culpabilidad pa algo cu e no a haci.
E caso aki a tuma luga cerca di Macro Supermarket na San Nicolas. Ora cu un homber cu tabata cantando a wordo aserca door di un homber desconoci p’e kende a pusha su man den cara di e victima y despues e grupo a cuminsa bringa cun’e pa te hinke y saca su shirishirinan.
