Durante un rueda di prensa den sala di presentashon na Green Apple, Infinity Media Aruba i The Lab, a anunsiá ofisialmente ku e di tres edishon di E-Aruba Business Seminar lo tuma lugá próksimamente dia 9 di yüni na e isla di Aruba. E motibu di nan bishita na Kòrsou ta pa invitá e komunidat di Kòrsou den komèrsio pa atende e evento. E-Aruba Seminar ya ta un konsepto konosí i popular unda ku oradornan internashonal ta duna varios charla riba tópikonan relevante na esunnan ku ta den komèrsio òf kisas lo kier kuminsá pronto. E aña aki e lo tuma lugá riba djasabra mainta dia 9 di yüni 2018 na Renaissance Convention Center Aruba.
Oradornan
Ku hopi espektativa a hasi e anunsio ofisial di e oradornan invitá ku lo kompartí lo último den tendensianan mundial ku e públiko. Entre otro for di Microsoft lo presentá Miri Rodriguez. Rodriguez su título ta ‘Storyteller & Social Media Manager’ na MICROSOFT i ta biaha rònt mundu pa kompartí su ekspertisio den merkadeo digital i kon ta e mihó forma pa trese un mensahe komersial dilanti. Tambe for di Merka Sr. Mario Vinasco, Marketing Manager Data Analytics di e kompania UBER tambe lo kompartí e último desaroyonan den e mundo di merkadeo i ku énfasis riba AI (Artificial Intelligence). Pa kompletá e lista di oradornan internashonal Andrea Vahl tambe lo ta presente. Andrea ta un outor famoso di e buki Facebook for Dummies i a wòrdu nombrá den e lista di e damanan mas importante den ‘social media’. Lo tin tambe oradornan i panelistanan regional ku lo trese e toke lokal.
Motibu pa atendé i e link ku Kòrsou
E mundu digital ta unu ku ta move hopi lihé i p’esei ta importante pa keda na altura di e novedatnan. Ta importante pa invertí den edukashon di bo mes i dor di atendé tipo di konferenshanan aki bo ta haña konosementu ku lo trese resultadonan positivo pa e empresa ku bo ta traha pe òf bo mes un negoshi. Hopi biaha nos mester biaha bai te Merka òf Ulanda pa atendé eventonan di e tamayo aki. Awor e ta un oportunidat úniko pa por bishitá e isla di Aruba pa un motibu di edukashon i pa establesé kontaktonan komersial.
Direktor di Infinity Media Aruba Sr. Mark Benson Denz a inisiá e proyekto aki na 2014 ku éksito i sigui ku e di dos edishon na 2017. E aña aki a uni forsa ku Sr. Diederik Kemmerling di The Lab Agency pa asina produsí un evento ainda mas eksitoso. Karchinan i mas informashon por haña riba internèt via www.e-aruba.com
