Introduccion di “Sugar Tax” riba dia 1 di januari 2020 lo nifica un impuesto adicional riba tur likido cu tin sucu den dje. Claro refresco ta esun mas popular pero ta bin juice tambe acerca y otro bebidanan di energia. Na tur Gobierno a conta cu e aña aki caba, den 6 luna, lo a cobra casi 17 miyon florin. No a logra caba cu e ley y awo kier pas’e pa otro aña. E departamento encarga pa cobra e impuesto ta Duana, cu a sigura cu e lo bira un aumento di por lo menos 1 florin na belasting riba cada bleki di refresco.
Ricky Croes a bisa cu di acuerdo cu un investigacion di Oficina Central di Estadistica, un total di 92% di nos poblacion ta bebe refresco y 8% ta bebe juice. Den comparacion cu Hulanda, na Aruba cada ciudadano ta bebe un promedio di 208 liter di refresco pa aña mientras cu na Hulanda e ta apenas 85 liter pa aña. Pesey Gobierno kier influencia e custumber aki, pasobra e ta causa hopi malesa.
Departamento di Duana a splica cu Gobierno tin varios scenario di con e kier implementa y cuanto lo aumenta impuesto riba refresco y juice. Asina por ehempel e scenario mas halto ta 1 florin na accijns riba cada bleki di refresco mientras cu e miho scenario ta un aumento di 92 cen pa cada bleki. Gobierno a pidi comercio mes pa conseha cua di e scenarionan ta mas util y eficiente pa nan.
Mientrastanto e refresco mas bendi na mundo, Coca Cola, ta haciendo hopi esfuerso for di basta aña caba pa reduci of elimina uzo di sucu den su productonan. Na Aruba tambe Gobierno tin pensa di no cobra accijns riba Coca Cola 0 y otro refresconan di dieet of sin sucu. Esey lo haci cu Gobierno lo haya menos entrada via e Sugar Tax cu de facto ta un forma pa aumenta ingreso di Gobierno, mas cu e ta un empeño pa promove un bida mas saludabel.
