DTI no solamente ta haci e trabou di keur auto, esta di mira si un vehiculo ta cumpli cu e condicionnan pa ta riba caminda publico. Nan tin mas tarea ta haci y ta trahando riba un plamo pa conscientisa e pueblo riba e otro servicionan cu nan ta Brinda.
Amko Koopmans ta encarga cu e trabou diario di e departamento gubernamental aki. Den combersacion cu e director, el a splica cu banda di keurmento di autonan, nan tin tareanan ijkwezen, stoomwezen, boiler, electra keuring y tambe kraan keuring. Asina tin diferente otro cos chikitonan mas cu e departamento ta wordo haci.
Un departamento importante ta Veiligheidsinspectie y Onderzoek. E ultimo aki ta controla e sitionan unda cu tin personanan ta traha y mira si ta cumpli cu tur regla pa e bida di ningun trahado core peligro. Gran mayoria di e controlnan aki ta den construccion, principalmente construccion di edificionan. E construccion na cas nan no sa controla. Sinembargo tin pensa pa den futuro focus den control riba construccionnan di cas tambe. Ora construccion finaisa, e control ey ta caba. Pero tin mas control pa arbeid na restaurant y hotelnan. Pues na cualkier negoshi DTI por tene su controlnan di siguridad, hasta por ehempel pa peluquerianan. Tin plan pa cuminsa cu un control poco-poco den diferente area laboral.
E ta kere cu DTI tin caminda cu por mehora. Asina nan ta trahando riba un reorganisacion y den esaki ta bay saca afo unda of cual ta e areanan riba cual nan mester bay focus. Tin hopi plan pa futuro pero aworaki nan ta enfoca riba loke ta nan “core business”. No mester lubida cu doño di cada negoshi ta responsabel pa su hendenan y mester percura cu su trahadonan ta traha den un ambiente sigur. Mester tin protocolnan di siguridad y mira cu esai ta wordo cumpli. DTI por dun’e guia con pa esaki pero DTI no por tey 24/7 rond. Doñonan mester haci di nan banda pa cumpli cu un ambiente sigur na trabou pa su hendenan. Y esnan cu no cumpli, DTI lo manda advertencia y hasta por para trabo.
