Diaranson gobierno a reuni cu departamentonan DTI, Elmar, DOW, DIP, DNM y Kadaster. E punto di agenda tawata e iluminacion di nos cayanan. Prome Minister a duna di conoce cu el a constata cu no tin un maneho fiho pa elimina e scuridad cu tin riba cayanan anochi y e scuridad cu tin den e barionan. E scuridad cu tin ta trece varios preocupacion y riesgo especialmente pa loke ta trata e trafico y tambe e siguridad social. Ta hopi importante pa den e camindanan crucial pa trafico of pa movecion di hende tin bon iluminacion riba nos careteranan.
Den e cuadro aki, hunto cu e departamento DNM, cu ta encarga cu e conservacion di nos naturalesa, lo fiha e maneho pa e miho manera pa trece iluminacion riba nos cayanan. Hunto cu Elmar y DTI lo bay stipula y inventarisa kico ta e necesidadnan teniendo cuenta cu e aspecto di naturalesa. Nos por mira proyectonan caba cu ta tumando luga entre otro e caminda di Ritz Carlton pa Malmok na unda cu sigur a tene cuenta cu naturalesa ora cu a pone luznan especialmente a tene cuenta tambe cu e proteccion di turtuganan den e area. Esakinan ta e consideracionnan cu ta tuma den maneho pa proteha e medio ambiente, e flora y fauna.
Prome Minister a enfatisa cu Aruba tin hopi necesidad di iluminacion den barionan. E ministernan anterior no a bin cu un maneho integral riba e tereno aki. Desde cu el a tuma e cartera di infrastructura, ta drenta hopi peticion cerca dje pa iluminacion den bario.
“Lo bay haci un inventarisacion di e luganan cu mas tin mester di iluminacion y apesar cu no tin hopi fondo ni recurso actualmente pa pone luz tur caminda cu tin mester, mester concentra riba areanan cu ta mas necesario pa garantisa mas siguridad den trafico y siguridad social. Asina poco poco y apesar cu ainda nos ta den e pandemia y cu ainda mi ta maneha e crisis di Corona, mi ta percura pa atende cu loke pa hopi aña no a haya atencion. Danki na e expertonan di nos departamentonan y institutonan gubernamental di Aruba, nos ta bay logra haci di Aruba un luga mas sigur”, Prome Minister Evelyn Wever-Croes a termina bisando.
