E dos casonan activo di Covid-19 na Aruba ta di dos ruman muhe, procedente di Barranquilla, Colombia. Ambos ta residente di Aruba y por lo menos un di nan tin nacionalidad Hulandes caba. Nan tabata cu vakantie na Barranquilla pero a keda pega eynan den pleno Coronavirus. Un di nan ta interna awo den hospital cu keintura riba 40 grado.
Tabata na februari ultimo cu nan a bay vakantie cerca famia na Barranquilla. Siendo eynan a start e brote di Covid-19. Cu tur e medidanan cu Aruba a tuma, nan a opta pa keda eynan. Pero awo, e situacion a bolter y Colombia ta memey den su “peak” pa cual a opta pa awo si regresa cas. Nan no tabata malo ni tabatin sintoma.
Despues di dos siman na Aruba, faltando un dia pa sali for di cuarentena, ata ta presenta sintoma y un di e rumannan tabatin keintura pisa. Tabata dificil pa haya dokter di cas pa atende cu nan. Mester a haci hopi yamada pa porfin haya personal di DVG activa y test e dos rumannan, ambos riba 60 aña di edad y cu ta bibando hunto.
Diadomingo nan a test y awe mainta Gobierno a anuncia cu e test a sali positivo. A opta pa transporta un di e rumannan awe cu ambulance pa Hospital, pa intern’e.
Awor aki e ekipo di DVG, cu desde fin di mei no tin caso activo mas, awor ta ocupa atrobe pa haci “contact tracing” pa test tur hende cu tabatin contacto cu e dos rumannan, inluyendo e pasaheronan cu a yega den e mesun vuelo cu nan for di Colombia.
