Dentistanan disgusta: AZV lo stop di cubri mayoria tratamento oral

4024

Dentistanan ta hopi preocupa cu e ultimo informacion di AZV caminda cu a introduci mas medida pa corta gasto cu consecuencianan devastador pa cuido oral. AZV lo corta tur cuido dental pa esunnan riba 17 aña, cu ta resulta den e porcentahe mas grandi di nos poblacion.

E locual AZV no ta cubri mas ta, entre otro, consulta di dolor (incluso ora di dentista na warda), potret ora di dolor, tratamento di dolor di djente, receta prescribi door di dentista, biopsia, trauma of accidente, plancha (djente falso) y hasta rancamento di djente. Hasta a saca orthodoncia for di e pakete pa esunnan bou di 18 aña.

Cu e decision di AZV, awor pashentnan mes lo mester paga pa e servicionan aki for di su propio cartera. Consecuentemente ta perhudica pashentnan den cuido basico durante di crisis, e tratamento nan menciona ta un necesidad, no un luho. E cambionan drastico aki lo afecta precisamente esunnan mas vulnerabel (cu menos recurso) den nos comunidad.

Ademas dentistanan ta lamenta e falta di transparencia di AZV, cu ta impone tur medida a corto plazo, sin pensa riba e consecuencianan cu ta fatal pa e pashent y tambe pa AZV.

Problemanan dental ta trece complicacion pa salud en general:
– problema pa kauw
– interaccion cu regulacion di diabetes
– problema pa curason/pulmon/stoma
– crea isolacion social
– problema (psycho)social (por ehempel ta bira mas dificil pa haña trabou)

Si un pashent no tin e manera pa paga pa e cuido necesario por spera cu un pashent:
– ta keda largo cu dolor innecesariamente
– lo tuma mas medicamento cu necesario y/of sin bon indicacion
– mas ziekmelding na trabou
– y ademas otro instancianan medico lo ser sobrecarga (un pashent cu pa motibo financiero no por permiti su mes di bai dentista lo bai hospital of su dokter di cas y na final di dia sin por ricibi e cuido adecua)
– ta bai bishita ‘dentistanan’ ilegal cu por forma un peliger pa su mesun salud, paso no lo tin regla di hygiena, garantia di diploma, etc.

Tur esaki lo tin un impacto negativo riba e calidad di bida di e pashent y ultimamente por ta hopi peligroso pa su salud.

Cu e medidanan aki e sosten cu Aruba a brinda mas cu 50 aña pa e cuido basico aki ta disparce por completo, sin previo aviso. E ta trece un situacion hopi preocupante.

AZV ta boga pa accesibilidad di cuido, calidad di cuido na un prijs rasonabel. Kitando e pakete basico di cuido oral pa adulto ta exactamente lo contrario di e mision y vision di AZV. Sin e ayudo adecuado e desvio lo trece retraso y costonan mas halto pa AZV y Aruba mes.