Ciudadanonan cu no ta cobra FASE a yega dilanti di Bestuurskantoor pa mustra nan mal contento pa no ricibi esaki ni Loonsubsidie. Nan a entrega 3 paket na Ministernan Evelyn Wever-Croes, Xiomara Maduro y Glenbert Croes. Minister di Asuntonan Social y Labor, Glenbert Croes, a acerca cada persona individual pa asina haya mas informacion di nan situacion.
Minister Croes a bisa cu e manifestacion aki ta na su luga pasobra hopi ta pasando den hopi necesidad y e no ta hayando un solucion pa nan preocupacion. Hopi di e problemanan e mandatario a reconoce, specialmente esnan cu no a cobra nada y p’esey ta pidiendo nan number di registracion pa check esaki. Tambe tin esnan cu a cobra FASE un biaha pero despues nan nomber ta manda pa Loonsubsidie, despues compania ta bisa cu e persona no ta traha cu nan. Segun e mandatario, nan no a premira e problema ey y e persona a keda pega den un limbo.
Brenda Maria Jimenez a splica e mandatarionan riba e situacion con ta manda nan di SVb pa Departamento di Labor. Tambe el a splica kico ta pasando den Departamento di Labor na momento cu e tabata presente pa su cita, unda cu e empleadonan no ta contesta telefon cu ta ring, ta manda e-mail y no ta haya contesta. Di cual SVb ta mescos pasobra ta pidi pa manda e-mail y pidi pa number di identificacion y despues no ta tende nada mas. Loke cu nan ta pidiendo pa bin cu un solucion pa henter e situacion aki.
Minister President, Evelyn Wever-Croes, a bisa cu lo sinta cu Minister di Asuntonan Social y Labor pa atende cu esaki. Tin hopi reto y tin cosnan cu mester soluciona, y Minister President a sigura cu hendenan ta trahando cuerpo y alma riba esaki. Tin 37 mil hende ta traha den sector priva y ta na riesgo pa perde nan entrada, di cual algun a perde esaki caba. Segun e mandatario, nan no tabata ekipa pa algo asina grandi, pero ta haciendo nan maximo esfuerso.
Minister Maduro a bisa cu nan ta bin ta atendiendo pa pone un sistema pa por atende e parti aki. E crisis aki ta uno sin precedencia y tin hopi presion. Ta purbando di yuda mas hopi hende cu ta posibel y nan sa di e parti e-mail y telefon. Ta atendiendo con pa haci esaki miho, pero e lo percura p’e placa t’ey pa e pagonan.
