Algo pasa di 3:15 diasabra atardi, patruya di Playa, Santa Cruz hunto cu esnan di trafico cu Visibility Team, a wordo dirigi riba e caminda di Mahuma. Esaki ta riba e Green Corridor airport bay ariba. Eynan un auto a bolter. E unidad a mobilisa na e sitio menciona pa asina cuminsa mira con serio e accidente tabata. A menciona cu auto a bolter y tin hende pega den e auto. Na yegada di e prome patruya a notifica cu tin un Hyundai Tucson color oranje numera A-32585 gebolter na e otro banda di caminda.
Banda di e otro caminda tabata tin un Chevrolet Corsa color blauw scur numera A-8818. Esaki tambe tabata envolvi den e accidente. Patruya di trafico cu a presenta, a pidi presencia di ambulance y unidad di rescate di Bombero cu urgencia pa motibo cu lo tin hende pega den e auto. Mesora varios hende den cercania tambe a duna un man pa asina por a saca e persona pega den e auto. Esaki tabata un dama basta grandi di edad.
Ambulance a presenta mesora y a paramediconan a duna e prome auxilio pa logra saca e dama herida for di e porta patras di e vehiculo y hinke den e ambulance pa e haya tratamento medico inmediato. Ora polis di trafico a bay hasi investigacion kioo exactamente lo a sosode , a saca afor cu e Tucson tabata bayendo direccion pariba y e Corsa blauw tambe tabata bayendo direccion pariba. Pa un motibo of otro e chaufeur cu e Corsa blauw a hala na su man robes y a sera e chauffeur cu e Tucson y e chauffeur di e Tucson no por a hasi net nada na e momento ey.
El a baha caminda y a dal den e asera bolter pa despues dal e palo di lus y bay para na e otro banda di caminda. Un otro ambulance tambe a presenta pa asina atende cu e manehador di e Corsa. Segun por a compronde cu e chauffeur di e Corsa a bira malo na stuur y ta pa e motibo ey e accidente a sosode. Daño material tabata basta. Ambulance a transporta e homber grandi pa hospitaal y takelwagen a hiba e Corsa. E Tuscson e polisnan mes a duna un man pa asina purba pone e auto riba su wielnan bek.
