Tanto ayera como awe, NV Elmar a haci uzo di un compania forensico pa investiga posibel fraude y ladronicia di placa den e compania nacional di distribucion di coriente. A scucha dos empleado y na final di ambos sesion, a prohibi nan entrada den tur facilidad di NV Elmar, mientras cu e investigacion ta andando. E compania a colecta suficiente evidencia, cu a presenta na e posibel sospechosonan.
E investigacion aki no a cay den bon tera bou di empleadonan. A causa cu awe merdia 1:00pm, e sindicatonan STA y ALVAST, cu ta representa mayoria trahado di NV Elmar a yama un reunion urgente pafo di e oficina principal di Elmar situa den Wilhelminastraat na Playa. Despues di a informa e trahadonan di e ultimo desaroyonan, a pidi reunion urgente cu e Director, Ing. Robert Henriquez.
Ey a mustra nan malcontento cu e forma con ta conduciendo e investigacion. E sindicato ta reclama cu a “verhoor” e empleadonan pa un tempo demasiado largo. Nan kier sa kico e acusacionnan ta y kico e caso ta encera. Aki gerencia di NV Elmar a splica e sindicatonan cu no por bay den detaye di e investigacion andando. Por papia di posibel iregularidadnan den asuntonan financiero di e compania. No por papia di acusacion ainda y pesey no a suspende ningun empleado tampoco. A nenga nan entrada dor di pone nan riba “non-actief” pa no stroba e investigacion interno.
Despues di a caba di splica Sindicato STA y ALVAST, nan a bay atende cu man miembronan, cu mesora a resumi trabou. Gerencia a splica ambos sindicato, cu como cu nan a manda informa e compania un rato prome cu nan lo tin un reunion bou ora di trabou, pa nan ta consciente cu ta conta esaki a base di “no work – no pay”.
