Tin un veredicto, caminda cu abogado David Kock a defende. Esaki tabata un veredicto planea pa otro siman, pero hues a delanta e veredicto. Esaki ta toch un topico di tur e dianan aki cu ta hopi den noticia.
Esaki tabata e origen di loke ta e problematica di sr. Staring di DVG, pasobra prome biaha cu sr. Staring diripente a wordo yama aden y a ricibi e prome carta di minister di Salubridad Publico. Minister a haci referencia na e articulo cu a sali den e noticiero E Arubiano di Farrah Boekhoudt, riba nan pagina web y tambe Facebook page, caminda cu e minister a pidi pa Staring duna aclareacion riba acusacionnan eyden.
Manera cu sa, e siguiente dia el a haya e toegangsontzegging, cual hues a suspende. No a resta otro cu prome acerca y solicita e noticiero aki pa rectifica loke a wordo publica. Lastimamente esey no a tuma luga, nan no tabata dispuesto. E cliente e ora a haya su mes e ora pa cuminsa cu un caso sumario contra di e noticiero aki. Hues den su veredicto di diabierna mainta, a ordena e noticiero pa rectifica e acusacionnan aki, basando riba un paar di cos.
Uno ta cu e noticiero no por a prueba e acusacionnan cu tin menciona den e articulo. Di dos tambe hopi importante ta, por ta mas manera un tipo di regla general, cu ora ta skirbi riba personanan, tin cu percura pa tende nan opinion prome cu publica e articulo. Tambe cu no tur cos ta noticia. Durante tratamento di e caso aki hues mes, un paar di biaha a puntra e contrapartido y bis’e pakico e cos aki mester bira noticia cu hendenan mester sa esaki, caminda cu e otro partido a cuminsa bisa cu tin problemanan di salubridad cu pueblo mester sa, mientras cu e acusacionnan no tin nada di haber cu salubridad en lo absoluto. Pero mas cosnan personal.
Tambe ta importante pa prome cu un articulo wordo publica, pa investiga cu si loke a wordo bisa ta cuadra y tambe skirbi’e na un manera menos dañino posibel.
Hues a duna e noticiero aki cu dentro di 3 dia e mester rectifica cu e texto manera cu a pidi. Sino lo tin multa pa dia cu ta core cu por yega na e suma di 25 mil florin, pero Kock ta convenci cu e noticiero awor cu e veredicto aki, lo djis rectifica y pa e caso aki por wordo cera.
