Diaranson algo prome cu 10’or y mey di mainta, a sosode dos boksmento riba e caminda druk di Shaba pa Tanki Flip. Polis di trafico y tambe un patruya di Noord tabata presente. E prome boksmento tabata entre un KIA y un Toyota Corolla. E otro boksmento a sosode net nan tras y tabata entre dos Toyota Yaris.
E chauffeur di e auto Kia a dal un brake y e chauffeur di e Toyota Corolla blanco su tras aparentemente no lo a controla su velocidad na tempo y a dal tras di e Kia. Patras di e Toyota Corolla blanco, tabata biniendo un Yaris blanco, e chauffeur di e Yaris blanco SI a sa di controla su velocidad na tempo y no a dal tras di e Toyota Corolla, pero lamentablemente patras di dje tabata biniendo un otro Yaris blauw den cual e chauffeur tampoco no por a controla su velocidad na tempo y a dal tras di e Yaris blanco.
E dos autonan cu a boks prome a haya hopi mas daño material, e Toyota Corolla Blanco no por a core mas y a wordo pusha poni na canto di caminda. E dos yarisnan nan daño material tabata chikito.
Segun informacion ricibi despues ta cu e Toyota Yaris blauw niun su papelnan tabata na ordo, e chauffeur no tabata tin rijbewijs y aparentemente tabata riba celular ora cu su yiu lo a haci fastioso patras sinta den auto y esaki a causa cu elo a dal tras di e Toyota Yaris Blanco. E Toyota Yaris blauw a keda confisca y transporta pa warda di Balashi.
