Yiu, nieto y bisanietonan entre otro famia y conocinan di Dora Hernandez a reuni diadomingo merdia na ballroom di Marriott pa celebra su fecha natal. Ochenta aña Dora a haci, pa cual a haya masha hopi bon deseo, regalo, pero tambe e sorpresa di diferente familiar cu a bin di afo pa celebra hunto cu ne.
Den un entrevista el a comparti cu maske su salud no ta completamente bon, e ta gradici na Dios cu el a yega e edad aki. “Ora bo ta jong bo ta haci tur trabou, curpa ta mas lihe; awo cu 80 aña e curpa ta bay poco poco,” el a bisa. El a conta cu e tin hopi recuerdo. Entre esunnan mas resaltante ta tempo cu su nietonan a nace y bisanieto tambe. Tur tabata sorpresa cu e tabatin salud pa por a weita esey.
Como conseho di bida Dora a dirigi na esunnan cu ta casa pa tin hopi pasenshi cu nan casa y hopi confianza pa nan bida bay bon. “Tur cos ta e bon confianza un den otro.” Mientras cu e secreto pa yega edad halto manera esun di dje, el a bisa cu ta djis traha. “Trabou tur dia. Trabou no ta mata hende, e ta haci bo jong.”
Finalmente el a probecha pa duna un palabra di pabien na tur e mamanan di Aruba deseando nan tambe hopi pasenshi cu nan yiu y nietonan. “Cuida nan y ser contento cu nan.”
