Sindicato SIMAR hunto cu su miembronan di e scol special “Un Paso pa Futuro” awe merdia a bay sede di Gobierno pa entrega un carta na Minister di Enseñansa Rudy Lampe, relaciona cu su maneho pa cu e scol “Un Paso pa Futuro”, cu ainda ta den incertidumbre si nan ta keda na nan facilidad.
Na yegada di e Presidente di SIMAR Josephine Albertus hunto cu docentenan di e scol, a resulta cu e mandatario encarga cu enseñansa no tabata presente, y ta na sede di John F. Kennedy School. Un delegacion a drenta paden y a dicidi di entrega un copia na Prome Minister Evelyn Wever Croes, cu kendenan nan a papia den pasado recien pa toch nan por keda na nan sede, patras di Postkantoor na Playa.
Inicialmente a bisa cu ta keda un aña pasa y despues ta scuchando cu esaki a cambia. P’esey nan a presente awe cu diferente pancarta cu entre otro ta bisa “Stop cu dictadura”, y “No na intimidacion” Por a nota cu tambe tabatin mayornan presente pa compaña e docentenan. Inclusive a scucha cu kier kita e cabesante y cabesante suplente debi na falta di desconfiansa. Nan ta sinti esaki como un forma di intimidacion.
E Presidente di SIMAR ey dilanti a bisa cu Minister di Enseñansa no ta compronde e diferencianan entre enseñansa regular y esun special. Y ta para riba cu e edificio actual ta mucho grandi pa e cantidad di studiantenan. “Mester garantisa cu tur mucha ta haya enseñansa regular y esun special, segun nan necesidad.”
E sindicalista a splica cu a renoba e edificio na 2007 pa enseñansa special. Esaki ta motibo cu e lokaalnan ta mas grandi cu un klas normal. “Pa saca e alumnonan for di un edificio cu ta adapta na nan necesidadnan, pa uno mas chikito, unda cu no ta tene cuenta cu e factornan aki, ta condenabel. SIMAR ta para pa derecho di enseñansa di calidad cu “Un Paso pa Futuro” merece. Loke Minister ta haciendo ta un falta di respet pa e docentenan, e alumnonan y mayornan.”
Na salida Presidente di SIMAR a bisa cu nan a expresa na Prome Minister Evelyn Wever Croes cu nan ta lamenta cu loke nan a palabra na e ultimo aña, awo ta uzando e mesun puntonan pa muda e scol. Awo cu no ta haya su gana, kier pasa pa intimidacion. Nora Eleanora a presente awe na e scol pa informa e suplente cu e ta bay dilanti klas bek y e cabesante ta bay bira suplente. Ta bay bini cu un otro persona cu si lo percura pa Scol Un Paso pa Futuro muda, el a informa nan.
Nan ta gradici Minister Presidente pa acepta cu nan a bini y tuma e carta. Ta lamenta loke e mandatario a bisa cu e docentenan no kier sigui control y cu el a dicidi di bay for di eynan pa no ricibi nan. Asina mes e grupo a bay John F. Kennedy.
Prome Minister a expresa su preocupacion cu e hechonan aki ta palabra caba y awo ta scucha cu cosnan no t’asina y cu nan mester a yega eynan den e situacion preocupante cu ta reina relaciona cu Covid-19.
