Diasabra anochi Minister encarga cu cultura dilanti un publico grandi riba Plaza Libertador G.F. Betico Croes a dirigi su mes na e e invitadonan y public presente:
“Aruba Patria aprecia, nos cuna venera, chikito y simpel bo por ta, pero si respeta”. Di e manera aki e tononan glorioso di nos Himno Aruba Dushi Tera ta cuminsa. Un cantica for di e mentenan creativo di sr Rufo Wever y nos inigualabel Padu Lampe cu despues di un lucha hiba pa entre otro nos Libertador Betico Croes a wordo oficialisa 42 aña pasa dia 16 di maart 1976 pa e Gobierno insular y resona pa promer biaha como e Himno di Aruba riba 18 di maart 1976 na Wilhelmina stadion.
Na mes momento e Gobierno e tempo ey a aproba y a inaugura e bandera di nos Pais di cual nos Libertador Betico Croes a yama e Flor di Libertad. Nos Himno y nos Bandera ta special, nan ta simbolo di un lucha cu nos Pueblo a hiba pa nos logra yega na nos propio identidad. Nos ta Arubiano cu cada bes cu nos Himno rezona, e ta corda nos con Bendiciona nos ta di por ta biba riba nos dushi Isla Aruba yena cu su encanto y su hendenan cordial. Y cada bes cu nos mira nos Bandera bula den tur libertad, e ta corda nos riba e dicha di por biba den libertad y di tin e oportunidad di desaroya nos mes a base di nos propio potencial riba e suela di nos Dushi Pais Aruba.
Nos Himno y Bandera hunto cu nos idioma materno Papiamento ta simbolonan di nos identitad y ta fomenta union. E union cu a brinda nos e corahe pa por a realisa un soño di hopi pa por ta baas den nos propio cas. E corahe pa por a logra nos Status Aparte y logra e libertad pa por fiha nos mesun futuro.
Cu tempo nos por a mira cu e union aki a cuminsa bay perdi y hunto cune e libertad cu nos tin pa dicidi pa nos mes. Ta parce cu hopi ya no kier haci e esfuerso pa conserva e libertad cu tanto nos Pueblo a lucha pe y cu nos bandera ta constancia di dje. Ta parce cu un mayoria a lubida riba e palabranan di nos Libertador Betico Croes, y mi ta cita “Si nos mester cay na caminda hamas boso laga e causa un banda, pero gara e bandera Arubano y sigui cu e lucha pa realisa y preserva e libertad di nos Pueblo.”
No ta pornada nos Libertador a laga nos cu e apelacion aki. E tabata sa cu nos libertad no a bin facil, y cu semper lo bay tin forzanan interno y externo cu lo bay pone na peliger.
Nos Pais awor aki ta enfrenta entre otro retonan financiero na unda nos ta para na un crusada peligroso cual ta pone nos libertad pa desaroya nos mes a base di nos propio potencial na peliger. E peliger di wordo priva di maneha nos propio interesnan y fiha nos propio futuro ta eminente. Elo exigi vision, determinacion y corahe pa enfrenta y atende cu e retonan aki. Nos libertad y e oportunidad cu esaki ta brinda nos, awe mas cu nunca ta bay depende di nos propio curashi y esfuerso.
Pero den nos Himno nos por saca e inspiracion necesario den e tercer couplet cu ta bisa, Grandeza di bo pueblo ta, su gran cordialidad, Cu Dios por guia y conserva su amor pa libertad. Ta bon pa recorda cu e tercer couplet aki a wordo agrega na e cantica Aruba Dushi Tera, a peticion di nos Libertador Betico Croes. Esaki ta muestra cu Betico kier a brinda nos den nos Himno e palabranan di aliento bisando nos cu pa atende cu e retonan di nos Pais nos no mester recuri na violencia of desunion, nos mester keda cordial, nos mester keda uni y nos mester pidi Dios su guia pa asina brinda nos e forza, e sabiduria, e curashi y pasenshi necesario pa nos conserva nos libertad.
E aña aki memei di tur celebracion, ban tuma tempo pa reflecciona riba e mensahe aki cu e tononan glorioso di nos Himno Aruba Dushi Tera ta trece cune. Ban para keto un rato y observa e libertad den cual nos Bandera ta bula y ban realisa cu awor mas cu nunca nos como Pueblo mester UNI pa asina nos logra conserva e libertad di nos Dushi Pais Aruba.
Pueblo di Aruba, apesar di tur reto nos dilanti, sinti bo orguyoso di por ta biba riba Aruba. Nos bon Dios semper a sa di Bendiciona nos Pais y yuda nos realisa nos soñonan. Ban tene Fe y ban traha hunto den union pa nos logra surpasa tur obstaculo nos dilanti. Ban laga e tononan glorioso di nos Himno Aruba Dushi Tera y e bandera como Flor di Libertad inspira nos cada dia pa den union nos logra biba pa semper den libertad. Felis Dia di Himno y Bandera!
