Sue-Ann Ras: Pakico CAFT a trata AVP cu handschoen di felpa?

373

Diabierna e colegio di supervision financiero di Aruba, CAFT, a publica su conseho riba tanto e presupuesto 2018 di pais Aruba como e documento adicional, cu ta splica e pasonan extra tuma, pa gobierno reduci e deficit financiero mas ainda.

Manera a bira custumber caba, CAFT su enfoke tabata uno puro economico, sin cu ta tene cuenta cu e realidad social di nos isla. “Consecuentemente, e conseho duna riba ambos documento menciona tabata grandemente negativo y manera nan a haci den tur nan rapportnan anterior, a presenta un lista di extra medida”, parlamentario pa MEP, Sue-Ann Ras a bisa como su prome reaccion. Y atrobe, segun Ras, CAFT a brevemente duna elogio riba e ‘intencionnan’ di e gobierno, pa despues sigui dal gobierno cu e lista di ‘critica’ y extra conseho …‘sino fono!’

Cambio

E unico cos positivo cu CAFT a haci pa e gobierno nobo, ta dun’e un espacio pa hala rosea y tuma mas tempo pa por bin cu un plan pa drecha e situacion financiero. Hopi mas tempo no a duna gobierno si.E parlamentario ta consciente cu ta a penas awor e ta un parlamentario. Pero e ta mustra mes momento si, cu e no mester tabata parlamentario of experto financiero pa mira e patronchi di actuacion di ‘tiger di papel’, cu CAFT a mustra cu e gobierno anterior. Ras ta corda, cu mientras cu CAFT tabata conseha instruccion, manera nada pa e otro islanan, semper Aruba tabata ‘scapa’ di uno, alargando e crisis financiero mas y mas.

“Nos tin confiansa cu Aruba su gobierno actual lo sa di drecha e cuenta”, of “Nos tin cu duna nan e tempo pa por traha”, tabata dichonan di e director anterior Age Bakker, Ras ta recorda di e tempo aya referiendo na e gobierno anterior.

“Desde cu nos a sinta como parlamentario, a reuni cu e constelacion ‘nobo’ di CAFT y aki nan tabatin un actitud fuerte.  Y ami ta puntra mi mes, si esey tabata e mesun actitud cu nan tabatin cu e gobierno anterior”, Ras a enfatisa. “Mes momento mi ta puntra mi mes, con bin a trata Aruba su gobierno anterior cu handschoen di felpa y asina bira ‘co culpabel’, pa a laga e situacion yega te na unda e ta aworaki”, e parlamentario a sigui puntra.

Medida

Ras a mustra cu gobierno aki a tuma e curashi y anuncia un lista di accion cu lo tuma pa por remedia e situacion financiero. A admiti cu esaki ta parti di e FEM y cu esaki lo mester yuda e situacion. Pero e parlamentario a tuma nota tambe di e 6 otro medidanan cu CAFT kier pa e gobierno aki tuma, sino ‘cos ta bay for di man’. Tur esaki mientras cu Prome Minister a bisa claramente e siman aki cu e intencion ta, pa por traha un plan di algun aña, pa por remedia e situacion. Pero den e rapport di CAFT publica diabierna, nan ta mustra atrobe cu nan no ta ‘di acuerdo’ y ta exigi pa gobierno tuma ainda mas medida y pa reduci e deficit prome cu 2021. Tur esaki ta pone cu Ras tin duda den e actuacion di CAFT y ta spera cu nan recapacita y compronde cu e loke cu e gobierno aki a y ta haciendo humanamente posibel, ta loke ta e actuacion mas responsabel como un gobierno.