Diasabra ultimo den presencia di manager nan di ekiponan di 9 pa 16 aña na edificio di ATIA, Aruba North Little League (ANLL) a instala su directiva.
E votacion a tuma lugar den un ambiente ameno despues cu a presenta na e managernan presente e cyclus di e guia operational di Little League International pa liganan local y e resumen di pr, secretario y financiero pa temporada 2018/2019. Ademas a scucha precupacionan y sugerencianan di esnan presente pa asina sigui mehora e funcionamento di e liga.
Un total di 15 manager a vota y resultadonan tawata como lo siguiente: Sr. Melvin Quilotte a keda re-eligi como president, Xiomajra Rafael como vice-president y miembronan general Lisa Giel, Jo-Anne Croes, Magaly Webb, Raul Gei, Sonaly Croes y Elston Figaroa. Lo reparti e diferente funcionan den e siguiente reunion como directiva di 2019-2021.
President di ANLL, Sr. Melvin Quilotte a remarca cu e ta satisfecho cu e trabou di e team di ANLL cu a logra trese bastante structura na e liga den e ultimo dos añanan. Cu e mesun entusiasmo lo sigui cu e trabounan den e proximo temporada, cada bes mehorando pa sigui engrandese e deporte di baseball pa ful e isla, no solamente e liga.
Kier a felicita e liga di ANLL cu e directiva y ta desea e team hopi exito pa e temporada di 2019-2021.
Ademas ta hasi un yamada na e comunidad di Aruba pa inscribi muchanan di edad 4+ cu ainda no ta practicando e deporte di baseball pa cuminsa train na un di e siguiente organisacion nan den bario: Aruba Juniors veld di Aruba Juniors (563-9850), Braves y Cabosports veld di Playa Pabou (732-9748), CBN veld di Centro di Bario Noord y veld di JTL (592-3819), Blue Marlins veld di Saliña Serca y veld di JTL (593-9029), Hammersharks veld di Kudawecha y Calabas (592-3232). E programa di Little League tin como lema: caracter, curashi y lealtad y ta ofrece un cantidad grandi di experiencianan unico y benefisioso pa nos muchanan y nos comunidad. Cuminsa informa awe mes di teamnan den bo bario y trese e yui, nieto/a, subrino/a y bisiña pa hasi su promesa.
Pledge / Promesa
I trust in God – Mi ta confia den Dios
I love my country – Mi ta stima mi Pais
And will respect its laws – Y lo mi respeta su leynan
I will play fair – Lo mi hunga eerlijk
And strive to win – Y hunga pa gana
But win or lose – Pero gana of perde
I will always do my best – Semper lo mi hasi mi best
Aruba North Little League (ANLL) ta cla pa desafionan nobo y ta cla pa sigui traha hibando e deporte di baseball pa dilanti. Abo kier yuda y kier forma parti di ANLL pa engrandese nos mundo di baseball y softball? Keda den contacto cu nos via nos facebook page: @ANLL.ARUBA
