Ex Minister di Husticia y Parlamentario di AVP, mr. drs. Arthur Dowers a trece su punto di bista pa loke ta pasando den prizon, cu na e momentonan aki tin yen di cos pasando. Den e fin di siman cu a pasa tabata tin hopi cos cu a pasa y cu a capta basta atencion.
Principalmente ora cu a haya reaccion di un cantidad di hende cu ta traha na KIA, cu nunca a spera algo asina aki, unda cu hasta ta pidi security pa bin traha na e instituto penitenciario.
Dowers ta splica cu e ta sigui loke ta pasando den KIA y e ta hopi sorprendi cu tin un Minister awe sinta cu a bisa den pasado, na momento cu el a bay pas bachi y bisa cu e ta e homber cu mester ta bao di husticia y lo soluciona tur crimen na Aruba. Y lo haci esaki den forma pragmatico.
Awe, e reaccion cu Dowers ta duna principalmente ta dirigi riba e hecho cu e Minister aki, a sali bisa cierto cosnan cu, segun Dowers, ta inacceptabel pa bisa como Minister di Husticia. No por ta posibel cu despues di dos aña na poder, ta sali bin bisa cu e no por haci nada pasobra a hereda un problema.
Ora cu bay goberna, tur loke cu tin bo ta hereda. No bin bisa cu abo, como Minister cu tabata ambiciona e posicion pa asina tanto, no ta compronde cu ora bo bira Minister, bo tin cu bay traha.
Kiermen, segun bo, e gobierno cu baha tin cu laga tur cos cla manera un regalo y abo tin cu bin y djis kita strik y bay cosecha. Asina ey e no ta traha, Dowers a expresa. Tin problema den un pais cu nos tur ta hereda y tur a traha cu nan, sin keha.
Loke ta straña Dowers, ta cu e cabayero aki ta bin despues di dos aña. Esaki ta e prome Minister den historia, cu ta tarda mas un aña pa yega KIA, pa pone su mes na haltura di kico el a hereda. Ken cu hereda algo, no ta lag’e dos aña pa su cuenta y despues di dos aña ta bay wak kico a pasa.
E Minister aki, un aña pasa a wordo notifica y tin rapport di Inspectie di Gevangeniswezen di Hulanda, cual Dowers a traha duro pa nan bin mira e situacion. E rapport ta bisa bon cla cu e puntonan cu ta mira mehoracion riba dje, tempo cu Dowers tabata Minister, tempo cu nan tabata trahando duro pa soluciona cierto problemanan, tur esey a para.
E reorganisacion cu tabata tin den KIA, a para pa dos aña. Tempo cu Dowers tabata Minister, tur siman tabata tin cierto sindicato ta critica na radio. Tur siman nan ta mira con nan por cuminsa cu un protesta. Tabata tin hende den prizon cu ta mira con nan ta lanta e presonan pa nan kima e luga.
Pasobra cu segun nan, nan mester haci cosnan pa nan. AVP a haci asina hopi y na final ta bisa cu dos aña a pasa y no a haci nada pa verbeterplan, nan no a haci nada na e reorganisatieplan, nan no a haci nada cu excepcion di e hendenan cu tabata nobo e tempo ey, pa pone pa reforsa e prizon, no a mira nada a pasa mas pa loke ta trata e prizon.
Esey ta hopi lamentabel, segun Dowers. No por keda sin traha riba e programanan cu tabata tin di formacion y duna mas programa pa actividad.
Nan no a bis’e, pero ta logico, segun Dowers, tin cantidad di hende cu ta birando malo, door cu tin cu caba cu e reorganisacion pa pone tur cos na su luga.
A papia cu na 2018 lo tin un director nobo. A bis’e cu un cos asina no por wante asina largo. Hasta nan a bisa cu tin un aprecio pa e trahadonan cu a keda, cu ta haciendo un esfuerso pa mantene e condicion di e prizoneronan aceptabel den prizon.
Tur e informacion aki a hay’e riba teblachi, danki na un inspectie cu a palabra den pasado y cu despues di un aña a yuda. Tur loke e Minister mester a haci ta cuminsa traha riba e puntonan aki, pero e no a haci nada.
E prioridad di e Minister tabata, helicopter. Logicamente, pasobra a cuminsa mira pa e deal ta sealed, door di hendenan di su mesun oficina di abogado.
E prioridad niun dia so tabata pa percura pa ni e preso, ni e trahadonan di prizon tin un miho condicion, segun Parlamentario Dowers.
AVP a drenta den gobierno y no a yora, manera e meneer aki ta yora. P’esey tin hende cu a kere cu ora AVP a drenta, cos ta bon. Ta hopi desaster nan a haya. Ora cu asumi un responsabilidad asina aki, tin cu traha cu e desasternan cu tin.
Awo, despues di dos aña sinta eynan bo ta bin yora y bisa cu no por handle e situacion aki, pasobra a herede. E ora tin cu puntra, kico a spera.
Tempo e tabata pas bachi e tempo ey, kico e mester a pensa cu e posicion di Minister a encera. Dowers no por imagina cu ta bringa tanto asina, ta difama Dowers y henter AVP, pasobra cu e por haci cosnan mas miho? Y awo ta sinta bisa cu el a hereda. Bikker no a hereda e cos aki. Awe, despues dos aña por a mira, cu e prizon no tabata asina aki.
Como Minister e mester ta honesto. E ta mustra cu ta un hende cu no tin conocemento riba e materia.
