E ley di LNT (Landsverordening Normering Topsalaris) cu ta drenta na vigor na juli awo, ta afecta e cabesnan di departamento di gobierno. E ta exigi cu e funcionario mas halto, no por gana mas cu 130% di e salario di e prome minister.
Pa un departamento chikito di gobierno e no ta causa preocupacion, pero si pa empresanan importante manera WEB, ELMAR y SETAR.
Minister di Energia, Glenbert Croes, tin WEB bou di su encargo y eynan e no ta preocupa pa motibo cu “tin hopi profesional cu ta stima Aruba. Alfredo Koolman ta un di nan.”
A splica cu Koolman tin un contracto a base di LNT y esaki ta conta tambe pa director di N.V. ELMAR, Anthony Irausquin, Ton Rojer (Utilities Aruba) y tur e directornan.
Pero e realidad ta cu tur e profesionalnan cu ta traha den N.V.-nan di gobierno ta haci un sacrificio mientras cu den sector priva nan lo por gana hopi mas. “Nos no kier perde e brainpower local den nos empresanan.”
E ta sinti cu den e añanan binidero mester contesta e pregunta ey. Si ta husto pa tene e profesionalnan den e norma aki. E tabata un di e exigencianan cu Hulanda a bini cu ne.
Di otro banda, e ta prueba cu aki na Aruba tin hende ta traha cu amor patriotico y a pesar cu a bini cu e exigencia di LNT pa tur profesional, e lo yega un momento, ora di recupera, mester tuma un decision si mester haci cambio riba e LNT.
