Departamento di Integracion y Maneho di Stranhero (DIMAS) ta corda tur cu ta depende di un permiso di estadia, pa controla si e ta vigente, prome cu biaha pa exterior.
Den caso cu e permiso ta bay caduca of a vence caba, por entrega un peticion via di un formulario online riba e siguiente link, durante di orario di oficina: https://form.123formbuilder.com/6192821/form.
Lo manda e pago di peticion pa e cliente via di e email adres registra den e peticion. Consecuentemente, e cliente lo por cumpli cu e pago sea via e opcion di Online Bill payment of door di haci un pago na cualkier MFA.
No ta necesario pa pidi un carta di reentrada na momento cu e cliente tin un permiso valido ainda. Si ta desea di haci peticion pa un carta di re-entry esaki ta posibel den caso cu tin un peticion pa prolongacion di permiso den tramite of cu tin un permiso vigente.
E proceso pa pidi un carta di re-entrada (re-entry) ta lo siguiente:
- Download, print y yena e formulario for di website di DIMAS via di e link:
https://www.dimasaruba.aw/wp-content/uploads/2017/06/BewijsTerugkeerR2016.pdf
- Hiba e formulario MFA y paga e suma di 40 florin na e cahero di Departamento di Impuesto
- Scan e comprobante di pago di e re-entry
- Yena e e-form Bewijs van Terugkeer via e siguiente link: https://form.123formbuilder.com/5341573 y upload e comprobante di pago y e documentonan rekeri.
DIMAS a tuma nota cu tin cliente ta pidi e carta di re-entry riba e dia cu nan ta yega Aruba. Pa evita cualkier inconveniencia cu por surgi na momento di regresa Aruba, DIMAS ta pidi tur cliente pa tene cuenta cu e proceso di peticion pa un carta di re-entry ta tuma minimo un siman pa e por keda cla, si e cliente a cumpli cu tur e rekisitonan ariba menciona.
