Fundacion Savaneta Prome Capital ta un fundacion recien lanta den luna di October pa traha pa districto di Savaneta cu meta di preserva tradicion y cultura y promove esaki como identidad di Savaneta pa nos turismo. Alabes fundacion ta desea di contribui na e desaroyo socio economico di Savaneta.
Den cuadro di fundraising Nos fundacion ta organisa un evento cu lo carga e nomber di Savaneta Christmas Village. Esaki ta un evento cu lo cuminsa pa 6:00pm den aire liber na Savaneta, desde dia 12 pa 17 di december. E lo ta un bazaar di articulo di Pasco combina cu musica di aguinaldo en bibo tur anochi.
E gruponan cu lo participa pa entretene nos bishitantenan ta entre otro Pegasaya, Flor di Pasco, Tradicion Musical, Community Choir Uptown, Michelangelo Koolman y e muchanan di Festival di Pasco. Diasabra na ciere di e evento lo tin un tributo na Dande y lo honra dos grandi den musica di aguinaldo y Dande di Savaneta esta Banchi Koolman y Miguel Van Der Linde cu e premio Curason di Oro di Savaneta.
Fundacion tin T-shirt di Savaneta na benta y tambe su biña di Mango traha netamente na Aruba pa nos sommelier y trahado di biña, Hubert Yarzagaray. Evento ta cuminsa tur dia 6:00 di atardi y termina 11:00 anochi y lo tin su bar y cushina.Tambe nos tin un bunita pesebre traha pa pastor Andres di Parokia di Savaneta.
Bin Savaneta y goza di ambiente di Pasco y fin di aña.
