Actualmente ta tumando luga na Den Haag, Hulanda e Aruba Investment Summit 2024, cu ta conta cu participacion di diferente comerciante di nos isla.
Presidente di Camara di Comercio di Aruba, Diederick Kemmerling, cu tambe ta presente n’e Aruba Investment Summit, a indica cu nan ta co-organisado di e cumbre aki, hunto cu Directie Economische Zaken y Minister Geoffrey Wever.
Camara di Comercio ta un organisacion cu, ademas di ta registra e empresanan riba nos isla, e ta representa e comerciantenan di nos isla, pa cual ta importante pa stimula inversionistanan pa inverti den nos isla. Pa loke ta inversionistanan, Gobierno y Directie Economische Zaken a establece cuater diferente specialidad, manera agricultura, creatividad, desaroyo sostenibel y e cuaternan aki ta defini y a ricibi un invitacion pa atende e cumbre aki.
Aruba ta participando c’un total di diescinco persona incluyendo Minister mr. Geoffrey Wever hunto cu demas miembronan di delegacion, manera ARENA, Directie Economische Zaken y Kemmerling tabata e unico representante di Camara di Comercio presente n’e cumbre. Nan a bin pa reuni cu e inversionistanan Hulandes y nan ta sumamente contento cu e sala tabata completamente yen, cual sigur ta mustra e interes di varios inversionista Hulandes pa bin inverti riba nos isla.
Mas aleu, Kemmerling a sigui bisa cu e enfoke ta riba inversionistanan, pero riba inversionistanan di calidad, cu kisas lo por yuda cu e maneho di desperdicio, pero tambe cu agricultura lo ta hopi bon. Pa loke ta e red tape, cual ta hacie dificil pa un comerciante di exterior bin establece su mes riba nos isla, el a bisa cu claro tin e red tape, pero den Gobierno y den Camara di Comercio tin hopi hende motiva pa yuda e inversionista nabega rond di e red tape pa inverti den nos isla.
Contrario na e otro islanan den Caribe Hulandes, na Aruba e economia y turismo ta creciendo hopi lihe. Esey ta un bentaha grandi riba e otro islanan. Aruba a recupera hopi lihe for di temporada di e pandemia di COVID-19. Esey ta sigur algo cu ta atrae e atencion di e inversionistanan. Aña pasa Aruba a ricibi mas di un un miyon turista compara cu 2020 cu ta cerca di 400 mil turista.
Esey ta haci cu Aruba ta hopi atractivo pa e inversionistanan Hulandes y como director di Camara di Comercio, ya caba el a cuminsa establece algun contacto cerca algun di e inversionistanna Hulandes presente durante e cumbre.
