Durante un conferencia di prensa na e seccion Arubiana, di Biblioteca Nacional, a presenta un buki di sr. Charles Croes, cual buki lo keda presenta diahuebs awo. E bario di Playa, Lagoen, Wilhelminastraat, Zuidstraat, Beatrixstraat, a produci diferente autor. Alice van Romondt, kende ta representa Cas editorial Charuba, a menciona varios autor entre otro Dennis Henriquez, Padu Lampe, Clyde Harms, tur ta hendenan di bario.
Charles Croes tabata tin un buki caba, segun van Romondt. Tabata un caminda largo sigur pa por a yega na e Caribbean Crossroad, pero e resultado ta bale la pena. E caminda largo cu a crusa pa hay’e diahuebs awo, pa 7’or y mey den hardin di Arubiana, lo celebra hunto e esfuersonan cu a engrandece literatura, cu un buki mas, e biaha aki na Ingles.
Ray Anne Hernandez di UNOCA, a comenta cu e buki aki ta uno completamente nobo pa e coleccion nacional di literatura Arubiano. Di parti di UNOCA a forma parti di e team cu a yuda pa haci e proyecto aki posibel y ta satisfecho cu resultado di e proyecto. Ta convenci cu ta trata aki di un proyecto lo tin su balor agrega, no solamente pa e mundo literario en general, pero specificamente ora cu bay den direccion di enseñansa, unda cu hopi biaha den examen klas por haci uzo di bukinan na Ingles, pa pasa examen. Ora cu papia di Caribbean Literature, hopi biaha nos falta e contenido di nos autornan Arubiano. Awor aki nos tin un producto cu ta agrega en todo caso na e arte literario en general di Caribe den su totalidad. E buki aki “Caribbean Crossroads”, ta un mustread pa un y tur cu gusta novela. E ta un storia cu por lesa hopi facil y ta un storia cu ta hibabo un tiki den un mundo di fantasia, pero toch cu ta realistico. Segun Hernandez, e ta recomenda tur esnan cu gusta lesa, pa bin presencia e lansamento “Caribbean Crossroad”.
Charles Croes ta e autor di Caribbean Crossroad. E no a laga afo Maria Silva, kende a dun’e su oportunidad unda cu e por a expresa su mes den poesia. E ta comenta cu a cuminsa cu e buki aki na Venezuela. Croes a bay un biahe cu su casa, pa cumpra varios cos pa traha un cas. E tabata kedando na un cas masha humilde y e cabayero kende tabata traha e tegelnan, a pidi pa keda cu nan y su guestroom tabata e vloer di cushina. Nan a pone dos cusinchi. Eynan Croes y su casa a drumi e prome anochi y e siguiente tres tambe. Tabata tin mucha chikito di 10 aña di edad y el a bin cerca Croes y puntre si e tin friu, mirando cu e tabata den un cushina. Croes a kere cu e lo a bay trece algo pa tapa. E mucha a expresa cu si e tin friu, e por bin y dun’e su calor. Croes no por a laga esaki bay.
E siguiente dia no a wak e mucha y ora cu anochi a yega, a puntr’e unda e tabata. El a bisa cu e tabata cuida cabrito, na e edad cu e tin di 10 aña. E tabata trahando caba den su cunucunan grandi hunto cu su tata. Esey pa Croes, a emocion’e masha hopi mes. Croes a pensa cu e cos aki no por lag’e keda asina. A cuminsa skirbi riba dje. Su prome trabao di dje tabata casi 800 pagina. A keda cort’e y mande pa varios editor. A yuda Croes cu esaki. A hinca e buki den otro, den un manera cu Croes ta spera cu e ta agradabel pa lesa y na e mesun momento e ta bisabo algo di un tempo cu a pasa nos. E nunca a bin bek mas. Na e mesun manera cu e episodio aki no lo bin bek mas. Ta un tempo unda cu nos Playanan tabata bashi. E ta un tempo na unda cu muchanan tabata mucha. E no tabata complica. Esey a purba di pone den e buki. Croes lo ta hopi contento si pueblo di Aruba aprecia e buki y por les’e cu gratitud. Ya Croes a cuminsa haya yamada for di Merca di esnan cu kier cumpr’e. E lo ta disponibel tambe na Merca y na Europa. E ultimo persona cu no por laga na banda ta Ron Smith. E ta cu NL Publishing na Hulanda y el a tolera masha hopi cu Croes. El a bin cu cosnan cu realmente e por coy e buki y bisa busca un otro publicista. Pero el a wanta cun’e. Croes lo bis’e un proximo biaha cu e lo wak’e, masha danki, pasobra e tabata un berdadero amigo, sinta banda di dje. El a pasa den hopi cos personal, tragedianan durante e buki aki, pero el a keda wanta. Caribbean Crossroad lo ta disponibel diahuebs awo na e seccio Arubiana Caribiana, na balor di 35 florin.
