E aerolineanan di Canada a acorda cu ta cancela nan vuelonan pa Caribe y Mexico. E gobierno federal a introduci reglanan obligatorio nobo di cuarentena mientras ta purba desencurasha biahenan internacional. Awe mainta, prome minister Justin Trudeau a anuncia cu Air Canada, WestJet, Sunwing y Air Transat ta suspende servicio di algun destino entrante diadomingo awo te cu dia 30 di april y lo haci areglo cu nan clientenan cu awor aki ta den e regionnan aki pa reorganisa nan vuelo di regreso.
E medida aki ta conta pa Aruba tambe, cu ta ricibi vuelonan semanal di Canada. Asina e aerolinea WestJet a anuncia for di algun siman pasa caba cu diadomingo awo ta nan ultimo vuelo pa awo. No tin fecha ainda di ki dia lo start di nobo. Sunwing a stop vuelo desde inicio di pandemia y nunca mas a reanuda e vuelonan. Y awo…desde diadomingo awo Air Canada tambe ta stop di bula pa Aruba te juni atrobe.
“Cu e desafionan cu nos ta enfrenta actualmente cu COVID-19, tanto aki na cas, como den exterior, nos tur ta di acuerdo cu awo no ta momento di biaha”, asina Trudeau a bisa p’afo di su cas na Rideau Cottage.
Cuminsando otro siman, tur e vuelonan internacional di pasahero, incluyendo pa Merca, lo baha na e aeropuertonan di Vancouver, Toronto, Calgary y Montreal. E prome minister a bisa cu mas pronto posibel, gobierno lo introduci pruebanan di PCR obligatorio na aeropuerto pa personanan cu ta bin bek Canada, ademas di pruebanan prome cu nan subi avion ya ta rekeri.
E pasaheronan mester warda te cu tres dia den un hotel aproba pa obtene e resultadonan di prueba, riba su propio cuenta, loke cu Trudeau a bisa cu e ta spera mas di $2000. Esnan cu tin un prueba negativo por caba cu nan cuarentena di 14 dia na cas, cu un mayor vigilancia.
“Implementando e medidanan duro aki awo, nos por spera un miho momento, ora cu nos por planifica nos vakantienan,” Trudeau a bisa. Tambe el a indica cu, den e proximo simannan, Canada ta cuminsa exigi biaheronan no esencial pa bin cu un prueba negativo prome cu nan pasa e frontera na tera cu Merca. “Nos ta trahando pa por cumpli cu e rekisitonan di prueba adicional pa biahenan na tera,” Trudeau a bisa.
Medidanan similar
E medida di awe ta sigui esun tuma simannan anterior riba presion politico di gobierno federal pa nan controla biahenan fronteriso. E accion di Canada no falta di precedente. Australia a exigi cu mayoria pasahero mester bay den cuarentena den un hotel asigna pa gobierno durante 14 dia pa $2800 dollar Australiano y $4620 dollar Australiano pa un famia di cuater. Inglatera a introduci medidanan similar diahuebs y awo ta exigi pa e ciudadanonan cu ta yega na boshi di paisnan di riesgo halto pa bay den cuarentena den hotel durante 10 dia riba nan cuenta.
Canada a prohibi biahenan no esencial pa e pais pa cualkier persona cu no ta ciudadano of residente permanente desde maart, pero a prohibi e fluho di Canadesnan dentro y p’afo di e pais ta un tarea dificil. Personanan cu ta bin di exterior pa rasonnan no esencial mester ta den cuarentena durante dos siman of core e riesgo di sancionnan financiero fuerte of bay cera, un medida cu tambe ta aplica desde maart. Na principio di e luna aki, mayoria pasahero tambe mester mustra un prueba di test negativo di COVID-19 prome cu yega Canada.
