Manera cu nos a informa den forma di primicia, awe Minister di Turismo, Salubridad Publico y Deporte, Dangui Oduberm a firma e acuerdo di trabou cu Marc Figaroa, como Director di Aruba Ports Authority. E ta asumi e funcion entrante diabierna awor, dia 1 di februari 2019.
Marc Figaroa tin un amplio experiencia den area comercial na Aeropuerto y ta cla awor pa ripiti e mesun exito aki pero na e dos wafnan di nos isla. E compania di Accountant, Deloite a efectua un proceso amplio di reclutacion, den cual varios candidatonan a solicita y na final a escogencia a bay pa Marc Figaroa, debi na su estudio, su experiencia pero sigur su trayectorio exitoso den maneho comercial na nos Aeropuerto.
Marc Figaroa tin un Master Degree den Business Administration y a specialisa den aviacion. Despues di a caba Colegio Arubano, el a sigui su estudionan na Daytona Beach, na Merca. E tin 13 aña trahando na Aruba Airport Authority NV y pa e ultimo 10 añanan e ta den funcion di “Commerce Manager” encarga cu henter e maneho comercial na e Aeropuerto di Aruba.
Mester menciona cu den e ultimo añanan, bou maneho di Marc Figaroa, Aruba Airport Authority a gana varios premio internacional, debi na e prestacion di e Aeropuerto, satisfaccion di clientenan, ofertanan comercial den e mal den Aeropuerto y sin lubida e parti di aviacion. Bale la pena añadi cu bou su maneho y cu su empeño y dedicacion, e entradanan di Aeropuerto tambe a conoce un crecemento drastico den e ultimo decada.
