Diabierna mainta tempran Corte lo dicta sentencia den e caso contra Gabriel Martien pa su rol den e caso speeltuin. A persigui Gabriel M. pa homicidio di e rumannan Rishandroh y Eugene y pa maltrato serio di e dos mucha hombernan den e periodo prome cu nan fayecimento, mientras cu e muchanan tabata cay bao di su cuido. E periodo a start na augustus 2017.
Banda di e hechonan aki a persigui Gabriel M. tambe pa maltrato di Risheila F. pa añanan largo y pa a dera curpa di Eugene pa evita e descubrimento di un crimen. Den e caso aki Ministerio Publico a pidi un castigo di 15 aña di prizon y TBS.
Fiscal a splica cu e castigo maximo pa e delitonan normalmente ta un castigo di prizon di 20 aña. Sinembargo, expertonan a determina cu Gabriel M. ta verminderd toerekeningsvatbaar, esta por wordo teni menos responsabel pa su actonan, tempo cu el a comete e hechonan. Entre otro e tin tur caracteristica di un psicopata y tin problema di personalidad.
Pa yega na e castigo exigi contra dje, Ministerio Publico a studia casonan comparabel y circunstancianan cu lo por haci e castigo mas pisa of menos pisa. Nan a yega na e conclusion pa exigi un castigo di prizon di 15 aña contra Gabriel M. Un di e consideracionnan tabata cu Ministerio Publico ta haya necesario cu banda di e castigo di prizon mester tambe impone un medida contra su libertad.
Diabierna mainta dia 6 di juli 2018 lo bay scucha kico Hues y Corte mes ta pensa di e caso aki. Si e por a yega na un decision cu loke a wordo presenta na dje of e mester di mas investigacion. Ya caba den e caso di mama di e muchanan, esta di Risheila, a dicidi di habri e investigacion di nobo. Den e caso aki no tin un fecha pa decision ainda. Hues a haya cu e rapportnan Psicologico y Psiciatrico ta contradeci otro pa cual e kier un evaluacion di nobo y a habri e caso bek.
