Diasabra 29 di october ta Dia Mundial di Stroke. Relaciona cu esaki, dr. Horacio Oduber Hospital a tene un anochi informativo titula “Bida despues di stroke”.
E charla informativo aki a tuma luga na MFA Paradera caminda cu a trece varios informacion dilanti riba e malesa aki. Brian Tromp, enfermero specialisa den neurologia a splica cu e charla tabata pa trece mas informacion relaciona cu stroke. E charla a papia y enfoka riba stroke, vooral e bida despues di stroke. A papia riba e parti medico, e factornan di riesgo, tratamento pero tambe kico e stroke ta bay nifica den e bida di e pashent, pero tambe den bida di e famia.
Tabata tin un interes basta grandi, y e departamento di neurologia a haya hopi pregunta di diferente organisacion di hende grandi, pero tambe di diferente iglesia. Esaki tabata e motibo pa cual a haci e charla na un luga publico.
Mas aleu, Tromp a bisa cu stroke ta e di cinco causa di morto mundialmente y na Aruba a e edad di e personanan cu a haya stroke ta bahando dia pa dia. Esey ta algo hopi alarmante. E factornan di risico di stroke ta colesterol halto, diabetes, obesidad y circulacion cu no ta bon. Y na Aruba bo ta haya hopi hende cu e dificultadanan aki.
Durante e charla di diahuebs, tabata t’ey tambe e diferente teamnan di Neurologia, dokter di Rehabilitacion, varios terapista, logopedista, dietista. A enfoca riba biba un bida saludabel.
Dr. Roberto Weiser, Neurologo na dr. Horacio Oduber Hospital, durante e charla a duna informacion di kico ta stroke, tocante su prevencion y bida despues di stroke. Poblacion di Aruba ta sufri di presion halto, tin hopi hende cu ta sufri di presion halto, obesidad, no ta haci ehercicio, e hendenan ta come y bebe hopi, cual ta haci cu e factornan di riesgo ta constantemente presente. Ta importante pa e pueblo di Aruba cuminsa informa su mes mas miho y cuida su curpa mas miho.
Prevencion ta keda na cada un persona, un di nan ta e parti di alimentacion, mester come mas fruta y berdura y baha man na come cos hopi zoet. Como parti di e prevencion y conscientisacion, ta bon pa bishita dokter regularmente si ta sufri di un of otro malesa cronico. Al menos un biaha pa aña haci test di sanger, tur esaki ta forma parti di prevencion y conscientisacion.
Si bo no ta cuida bo curpa, Weiser a finalisa bisando, bo ta den peliger di haya un stroke na cualkier momento.
Bo curpa, abo tin cu cuid’e!
