Na Centro di Bario Playa Pabou ta un tradicion, cu riba 30 di april, tin pustamento di fli.
Dennis Burke, Presidente di Centro di Bario Playa Pabao a cuminsa na bisa cu nan tin varios aña caba cu nan ta hisa fli. Anteriormente riba 30 di april, conoci como Aña di La Reina. Desde 2013, cu e ascencion di Rey Willem-Alexander n’e trono di Reino Hulandes, ta celebra Dia di Rey, cu ta riba 27 di april, e cumpleaños di Su Mahestad. Aña pa dia e actividad a bira grandi.
Luis Ras, organisado a indica cu dia 26 di april, lo tin un actividad di fli di anochi. E lo cuminsa pa 7:30pm. Dia 27 di april, e actividad lo continua, na Centro di Bario Playa Pabou, competencia den diferente categoria di fli. Dia 28 di april, tambe lo tin un competencia di fli mas grandi, te cu 3 meter. Esaki ta pa motibo cu e veld no ta tuma fli mas grandi cu tres meter.
Inscripcion lo ta dia 28 di maart, na Citizens Insurance, pa 7:30pm. Inscripcion pa fli di anochi ta 15 florin, pa diasabra e categoria di 50cmx1m, cu ta 15 florin, categoria B ta 20 florin y categoria C ta 25 florin.
Pa dia 28 di april tin dos categoria, cual ta 2mx2.50m ta costa 25 florin y di 2.50mx3m ta costa 30 florin.
Un invitacion na comunidad di Aruba, pa bin celebra Dia di Rey, hunto cu Centro di Bario Playa Pabou.
Orlaida Orman, representante di Citizens Insurance cu ta e sponsor principal di e evento aki, a extende un invitacion na ful comunidad di Aruba pa bin apoya y aporta na e evento aki, cu e organisadonan ta hacie cu hopi amor y dedicacion.
