Awe ta celebra cu 209 aña pasa Venezuela a proclama su independencia for di Spaña. Na Aruba e celebracion ta keto y sin e evento protocolario tradicional cu ta organisa riba Plaza Libertador Simon Bolivar. Ta dos of tres aña caba cu e Consulado General a para e evento aki, debi na retonan financiero. Pero e aña aki tin mas motibo pa keda sin celebra e dia.
Hopi Venezolano pega na Aruba
Na Aruba tin por lo menos 200 Venezolano pega, cu mester deporta of expulsa pa nan pais natal pero cu keto bay ta aki debi cu fronteranan ta cera. Nan ta encarcela keto bay den KIA despues di sinta nan condena of ta wanta den Warda nos Costa of ta na cas y mester meldo tur dia na Warda nos Costa.
Gobierno Venezolano no kier habri frontera pa vuelo humanitario
Fuera di e grupo cu mester bay den forma obligatorio, tin tambe e grupo aun mas grandi cu a bin Aruba pa vakantie of pa busca un trabou, pero cu a keda pega aki debi na e pandema y ceramento di frontera entre Aruba y Venezuela. Ta un grupo grandi di entre 200 pa 300 Venezolano cu regularmente ta protesta dilanti Consulado di Venezuela debi cu no ta haya contesta. Gobierno di Aruba a bisa di no tin problema pa nan bandona nos isla pero Gobierno di Venezuela no kier aproba pa e vuelo humanitario yega for di Aruba cu nan propio ciudadanonan.
Pa haci e situacion pio, algun siman pasa a permiti si un vuelo di Venezuela pa Aruba cu Arubianonan pega na Venezuela pero no a permiti pa e mesun avion regresa cu Venezolanonan pega aki na Aruba.
Consul mes ta na Venezuela
Di otro banda, e situacion ta complica mas ainda ora tende cu e propio Consul General di Venezuela na Aruba ta pega na su pais desde maart caba. Debi na e pandema y ceramento di frontera, e representante diplomatico di Venezuela a opta pa keda cas y no bin Aruba pa por saca un man pa yuda su ciudadanonan sclamando pa ayudo. Te cu awo, ta via Cruz Cora ta brindando ayudo humanitario den forma di cuminda pa e Venezolanonan pega na Aruba.
Celebracion di Dia di Independencia di Venezuela
E Venezolanonan ta celebra 5 di juli awe den un cuarentena sanitario estricto, ta dia di e Declaracion di Independencia di Venezuela y Dia di Fuerza Armada Nacional Bolivariana (FANB). Ta recorda cu dia 5 di juli 1811 como un di e fechanan mas importante di e historia di e nacion Sur Americano pasobra ta marca e fin di e Colonia Spaño. Aunke e aña aki e situacion epidemiologico ta impedi e celebracion tradicional di desfile militar, ta haci esaki via mensahenan y medianan social, actividadnan academico virtual, entre otro iniciativanan.
E historiado Aldemaro Barrios a destaca e trascendencia historico di e fecha, cu a marca no solamente e independencia, pero tambe un momento importante despues di e creacion di e Constitucion nobo cu ta goberna destino di e pais.
El a bisa cu e independencia di Venezuela a cende e candela independentista di e continente y henter mundo. “Manera y con e nacion Sur Americano aki ta sigui di ta un menasa inusual p’e imperionan, p’esey Merca a despoha e filial petrolero CITGO y a aumenta un blokeo economico y financiero brutal, mientras Inglatera a horta 31 ton di oro Venolano”, asina Barrios a bisa.
El a mustra riba e principio di independencia y soberania hereda di Simón Bolívar, pero tambe tur otro heroe di e patria. Ta corda e grito di “Independencia y patria liber!” p’e independentistanan, e pueblo Venezolano cu ta sigui grita “Independencia y patria socialista. Nos lo biba y nos lo vence!” cu comandante Hugo Chávez a laga graba den memoria historico di Venezolanonan ora el a bisa ayo: Awo nos tin patria.q
