Prome Minister Evelyn Wever Croes a bisa cu e virus Covid-19 no ta bay por lo pronto y mester siña biba cu e virus. “No por laga miedo domina nos. Y awe cu e fase nobo tin cu enfrenta e miedo cu curashi,” e mandatario a bisa despues di anuncia cu dia 18 di mei porta di algun scol lo habri.
A pidi directivanan organisa diferente session di informacion pa pone mayornan y docentenan riba diferente fecha riba con scolnan ta bay habri y kico ta e normal nobo. Y tambe pa studiantenan. Tur esaki via di sistema virtual.
E mandatario a bisa di tin hopi preocupaciony pregunta cu nan ta bay trata di contesta e siguiente dia y a bisa for di adelanta cu esaki lo tuma luga den un forma sigur.
E mandatario a splica cu e siman aki a reuni cu directivanan di scolnan y a papia ampliamente riba tur loke cu mester bay tene cu ne. Ta bay tin scolnan cu por habri nan porta y otronan lo no ta prepara. Tur esaki lo anuncia despues. Sharin Koolman (DVG) a bisa cu nan ta trahando riba Protocolnan cu e directivanan y ta sigui raportnan di Hulanda, cu por practica na Aruba, enbes sigui sistemanan manera na China.
Loke tabata remarcabel cu Minister encarga cu Enseñansa mes no tabata presente durante e anuncio aki.
