Hues a condena Ambtenaar cu a tuma placa bou man pa regla “restitutie”

5999

Corte a dicidi recientemente cu e decision tuma door di Departamento di Impuesto (DIMP) pa retira un funcionario publico tabata na su luga. E retiro a drenta na vigor entrante prome di april 2020. E caso aki a cuminsa for di aña 2018 ora a descubri manipulacionnan den e procedura pa pago di restitutie, den cual un ambtenaar di DIMP mester tabata envolvi.

Esunnan envolvi ta e funcionario di DIMP y su bisiña, kende durante un combersacion a inform’e di post di Impuesto cu el a ricibi cu mester haya placa bek. “Mi ta bay tira un bista pabo,” e funcionario a bisa su bisiña un dia na 2018. E problema no ta cu por yuda un hende pa haya su restitutie mas lihe si e manda un carta di peticion cu su motibonan, pero e problema cu esaki no a sosode y tabatin manipulacion den e sistema haci door di e funcionario.

Fiscale Inlichtingen en Opsporingsteam (FIOT) a informa dia 28 di september 2018 cu tin iregularidad descubri den e mapa digital di trabou. Investigacion a cuminsa y na december a suspende e funcionario mand’e cas te ora cu tin un decision tuma riba su caso. Mientras cu e investigacion a sigui, a tuma declaracion di e beneficiario, kende ta e señora bisiña di e ambtenaar.

Entre otro el a declara cu el a bay oficina di DIMP unda e ambtenaar a traha un carta pa e firma cu e ta pidi pa verjaring di cierto pagonan di impuesto y cu cual, segun e ambtenaar, e bisiña di dje el a yud’e scapa di paga mas cu 10 mil florin. E ambtenaar a bis’e tambe cu si el a laga un oficina di accountant haci esey p’e, e lo mester a paga hopi placa, mientras cu e ta cobre solamente 10% di e suma cu el a spaar.

A resulta cu door di e manipulacion, DIMP a paga e señora mas cu 41 mil florin, siendo cu e tabatin un suma pa ‘verreken” cu ta nifica cu e no a paga e debe di 22.470 florin cu e debe DIMP. A resulta cu e ambtenaar na september 2018 a blokia e debenan di e señora cu code 2, cu ta un code pa evita cu “verrekening” ta tuma luga. Y despues a manda un peticion pa su colega pa aproba pago di e restitutie ya cu el a haci un peticion di “voorrang”, cual no tabata berdad.

Den e declaracion cu e señora a duna, ta bisa cu despues cu el a haya e restitutie, el a hinca 1100 florin den un envelop y a hibe pa su bisiña ambtenaar, pero e funcionario ta nenga esaki. Corte ta conclui cu nan no tin motibo pa duda den declaracion di e señora, ya cu haciendo esey, e ta culpando su mes tambe di a haci algo ilegal. Esta di pone un ambtenaar di haci algo contra su obligacionnan. Ademas, el a duna declaracionnan detaya y den grandes lineas ta para tambe den e dossier.

Resumiendo, Corte ta bisa cu e ambtenaar a faya barbaramente cu su deber y obligacionnan di un empleado publico. E ta responsabel pa su actonan pa cual e castigo disciplinario ta na su luga.