Na yegada di autoridad a topa berdad cu un victima, cu tabata mustra den un estado masha grave. Na e sitio testigonan a bisa polis cu un auto a alcansa e señora y cu e chauffeur a sigui core bay, lagando e señora gravemente herida atras. Esaki ta un acto castigabel pa ley!
Paramediconan riba Ambulance a topa cu poco pulso toch y a opta pa transporta e señora cu urgencia pa hospital. Lamentablemente na yegada na hospital, dokter a constata cu e señora no a haal e mes, debi na tur e slanan cu el a ricibi.
No a keda nada mas pa e dokter haci cu constata morto pa 7:49 am. E victima ta Ana Rosa Montaño Martinez, naci dia 16-02-1962 (60 aña) na Republica Dominicana.
Polis specialista di trafico hunto cu polis forensico tabata na e sitio pa haci investigacion. Via camara di siguridad y testigo lo mester yega na causante di e hit and run cu consecuencia fatal. Tin discripcion caba di e modelo di auto y hasta ta menciona cu tabata un hende muhe tra’i stuur. Ta sospecha cu e lo por ta burachi of por ta un persona indocumenta, cu a opta pa bay laga e victima atras, sin bida.
Polis ta haci un apelacion, si un persona por a mira algo of sa algo, pa yama e tiplijn di polis na 11141. Bo yamada ta keda anonimo.
Headlines Group, cas editorial di 24ora.com y TREMPAN ta expresa palabra di condolencia na famia di e fayecida.
