Sigui crece, ta locual cu pa Aruba Timeshare Association (ATSA) ta hopi importante. Netamente locual nan a brinda pa e personanan cu ta traha den horeca. Riba 25 di november ultimo a inicia e prome sesion di e curso y ‘masterclass’ pa e sector turistico. Sulaika Kelly ta miembro di board di ATSA, durante un entrevista cu representante di Healines Group, kende ta e cas editorial di 24ora.com y TREMPAN, a conta cu nan a bende un total di 366 ticket pa e cursonan aki.
E evento ta den cooperacion cu Caribbean Hotel Tourism Foundation y sosteni pa Aruba Tourism Authority (ATA). Durante e dos siman di curso y training, lo enfoca riba tres area; F&B, houskeeping y supervisory. Tipo di curso asina ta necesario y durante e trainingnan brinda, e instructornan ta yuda bo saca mas hopi creatividad cu ta posibel for di bo mes pa na final di dia brinda un miho servicio na e turista. E experencia pa e turista ora ta riba nos isla ta hopi importante. P’esey mes ta enfoca riba horeca completo, for di e housekeeper pa chef, waiter, te na e supervisor di un hotel, pues tur hende envolvi den e sector ta ricibi mas conocemento.
E instructornan ta e hendenan cu a bin di afo y ta e personahenan yena cu experiencia. Louise John ta un di e instructornan y el a conta cu e cursistanan por conta cu curso yena cu cos nobo y hasta training di idioma. Con pa atende cu turista, con pa acerca, con pa combersa ta tipo di contesta cu lo brinda durante e dianan di curso. “I am ready to deliver service” ta locual e cursistanan lo hiba cas despues di cada training.
