Pitch Time Aruba ta un proyecto cu Cede Aruba ta organisa. E prome edicion a tuma luga na aña 2019, pero debi na e pandemia, a pospone e edicion di aña 2020. E aña aki si nan ta cla pa sigui cu e di dos edicion.
E programa PITCH TIME ta crea un manera nobo pa hoben por participa y siña habilidadnan rib’e tereno di proyecto social. E programa ta tuma luga den e periodo di juni te october 2021 y ta consisti di diferente fase.
CON PA PARTICIPA
Dia 4 di juni 2021 ta e deadline pa e hobennan entrega nan idea cu lo haci un impacto positivo riba e gruponan vulnerabel den nos comunidad. Hobennan tin cu graba nan mes ta conta di e proyecto y mand’e pa [email protected] of na 5827666. Tin cu graba e video horizontal, pues bo telefon di banda pa por cubri e pantaya completo. Cada hoben cu drenta den e competencia lo traha hunto cu un youth coach.
Durante luna di juni y juli, e proyectonan selecta lo participa na Pitch Time Academy. Durante Pitch Time Academy e hobennan lo ricibi curso tocante entrepreneurship, public speaking, project management, team building y con pa duna un pitch. Asina nan lo prepara nan PITCH pa e proyecto.
Na final di e Pitch Time Event, e sponsornan lo scoge pa nan proyecto. Un total di 15 proyecto lo ricibi un yudansa financiero na balor di 5 mil florin pa cumpli cu nan idea. E teamnan cu a gana lo bay den e ehecucion di e proyecto y lo presenta nan resultado na october 2021 durante e Pitch Time Moment.
E anochi aki lo bira uno bunita cu testimonio di NGO’s, hoben- y companianan. Pitch Time Aruba y Cede Aruba ta gradici Setar, FCCA, AAA y Aruba Bank pa contribui cu e fondonan necesario pa e hobennan cumpli cu nan tarea.
