Loke mester a bira un detencion comun y coriente pa destruccion y disturbio di ordo publico a termina den un tragedia cu a laga un famia den profundo dolor y cu hopi pregunta sin contesta. Juan Carlos “Carlito” Croes, un homber di 52 aña di edad, a fayece den oranan di marduga despues cu a intern’e di emergencia den hospital cu slanan serio na su curpa.
Segun e prome informacionnan, polis a bay den e area di Palm Beach despues di a ricibi informe cu e homber tabata bou influencia y causando destruccion na un cas eybanda. E detencion mes a tuma luga pariba di Wendy’s na Palm Beach.
Un testigo na e sitio a logra graba e momento di e detencion riba video. Riba e imagennan aki…
Loke mester a bira un detencion comun y coriente pa destruccion y disturbio di ordo publico a termina den un tragedia cu a laga un famia den profundo dolor y cu hopi pregunta sin contesta. Carlos Croes, un homber di 52 aña di edad, a fayece den oranan di marduga despues cu a intern’e di emergencia den hospital cu slanan serio na su curpa.
Segun e prome informacionnan, polis a bay den e area di Palm Beach despues di a ricibi informe cu e homber tabata bou influencia y causando destruccion na un cas eybanda. E detencion mes a tuma luga pariba di Wendy’s na Palm Beach.
Un testigo na e sitio a logra graba e momento di e detencion riba video. Riba e imagennan aki por mira claramente cu Croes tabata cana normal y tabata resisti su detencion mientras e tabata gritando “yuda mi”, probablemente debi cu e tabata bou influencia.
Di warda di polis pa hospital
Despues di e detencion pariba di e restaurant, polis a traslada e detenido pa warda. Te na e momento ey, no ta conoci exactamente kico mas a pasa paden. Sinembargo, e situacion a tuma un giro drastico ora cu ambulance mester a hiba Carlos Croes di emergencia pa hospital den un estado extremadamente critico, casi sin bida, y cu un cantidad di sla grave na su curpa, incluyendo basta sla interno.
Ora cu e famianan a yega hospital pa bishit’e, nan a topa cu un escenario horibel. E cara y cabes di e victima tabata completamente “na werki” y asina hìncha pa motibo di e golpinan cu tabata dificil pa reconoce. Potretnan cu ta circula ta confirma e estado lamentabel den cual el a keda.
Desgraciadamente, mas den marduga, e homber a fayece pa motibo di e lesionnan grave.
Investigacion ta andando
Te na e momentonan aki, Cuerpo Policial mes no a brinda informacion oficial tocante e suceso. A tuma e curpa sin bida di Carlos Croes den beslag pa autoridadnan competente pendiente un investigacion profundo pa determina kico exactamente a pasa for di momento di su detencion te ora el a yega hospital den e condicion aki.
For di nos parti, nos ta manda palabra di mas profundo condolencia y forsa na e famia di e defunto den e momentonan dificil aki. Cu su alma descansa na paz.
