Minister di Husticia, Integracion y Energia, mr. drs. Arthur Dowers, ta rechasa e impresion cu ya a establece, esta cu maltrato policial a causa e morto di Juan Carlos “Carlitos” Croes, e detenido cu tabata den Warda di Polis di Noord y cu despues a fayece na hospital. Den un entrevista cu Edward del Orbe di 24ora.com, e minister a declara cu, segun e informacion cu e tin actualmente, no tin indicacion cu polis a bati Croes y pon’e den e condicion cu a conduci na su fayecimento.
Dowers a expresa su profundo condolencia na famia di Croes y a reconoce cu nan ta pasando den un situacion hopi doloroso. Na mes momento, el a haci un apelacion na comunidad y prensa pa warda e investigacion di Landsrecherche, cu ta tuma luga bou responsabilidad di Ministerio Publico.
“No tin ningun indicacion na e momento aki”, Dowers a declara, refiriendo na e acusacion di maltrato policial. Esaki ta e posicion di e minister basa riba loke e conoce actualmente; e investigacion ainda ta andando.
Facebook Live
Minister a bishita Warda di Noord
Minister Dowers a informa cu el a bishita Warda di Polis di Noord pa orienta su mes tocante e caso. El a papia di e presencia di Landsrecherche y di imagenan cu por contribui na saca afor kico a pasa.
Segun e minister, el a mira parti di e imagennan di e intervencion. El a aclaria, sinembargo, cu e no a mira tur e grabacionnan ni e momento prome cu polis a yega. Den e parti cu el a mira, segun su evaluacion, polisnan tabata tratando di domina Croes y pa trece e situacion bou di control.
Dowers a describi e detenido como un persona cu, den e imagenan cu el a mira, no tabatin control riba su curpa. El a sugeri cu posiblemente algo cu e persona a tuma por a contribui na su condicion. E posibilidad aki no ta un conclusion medico ni un resultado confirma di e investigacion.
E minister a sostene tambe cu Croes no a yega warda maltrata y cu polis no a maltrat’e den cel. Landsrecherche y Ministerio Publico mester trece claridad tocante e hechonan y e circunstancianan di su morto.
Preguntanan tocante lesion y sangramento interno
Segun e informacion comparti cu 24ora.com, e detencion di Croes no a transcuri facilmente. Ora el a yega hospital, e tabatin lesion na cara y cabes, ademas di lesion interno y sangramento interno. E informacion aki a provoca preocupacion y reaccion fuerte riba rednan social, caminda diferente persona ta responsabilisa polisnan pa su morto. E investigacion mester aclaria con e lesionnan a surgi y cua relacion nan tin cu su morto. Dowers a indica cu e no por divulga tur e detayenan cu e conoce, pasobra nan ta forma parti di e investigacion. Ministerio Publico lo informa comunidad na e momento apropia.
Comunicacion cu famia
E minister a enfatisa cu famia mester ricibi informacion tocante loke a pasa y e prome hallazgonan. El a indica cu algun famia ya a acerc’e y cu el a splica nan di e situacion. P’e ta importante pa famia conoce e informacion disponibel mientras e investigacion ta sigui su curso. El a reconoce cu ta un caso complica cu ta afecta tanto e famia como comunidad y Cuerpo Policial.
Evaluacion di e actuacion y apoyo di otro profesionalnan
Minister Dowers a indica cu mester tin un evaluacion profundo di con ta atende cu casonan di e naturalesa aki. Polis tin conocemento y instrumentonan pa domina un persona, pero tin situacion complica cu ta exigi participacion di otro profesionalnan tambe. El a observa cu polis ta e prome instancia cu comunidad ta yama ora tin peliger, mientras cu algun di e casonan cu agentenan ta enfrenta por exigi atencion pa cual nan no ta suficientemente prepara.
Dowers: No tin indicacion di un aumento di violencia policial
Riba e pregunta si polis ta actuando cada biaha mas violento, Minister Dowers a contesta cu e no tin indicacion di esey. El a argumenta cu agentenan ta enfrenta situacionnan di riesgo y cu pa evalua un intervencion ta necesario conoce e contexto completo.
Segun e minister, un grabacion cu ta mustra solamente un parti di un actuacion por conduci na un conclusion robes si no ta conoci kico a pasa prome y despues. El a subraya cu, si un polis comete un eror, e proceduranan y medidanan corespondiente mester sigui. Pero el a sostene cu tampoco ta corecto pa condena e agentenan publicamente sin suficiente informacion.
Mientrastanto, Landsrecherche ta continua cu e investigacion cu mester trece claridad tocante e detencion, e estadia di Croes den Warda di Polis na Noord y e circunstancianan cu a conduci na su morto despues.
