Un alerta mundial pa dos defecto grave di siguridad den PHP, un programa cu ta yuda website procesa informacion y funciona corectamente, a provoca preocupacion internacional. E defecto por permiti criminalnan cibernetico drenta den e servernan sin autorisacion, horta informacion of interumpi servicio.
E problema, conoci como php2shell, a provoca intento di atake cibernetico (cyberattack) confirma pa compania di siguridad Cloudflare. Autoridadnan internacional a recomenda actualisa sistema inmediatamente pa evita cu criminalnan probecha e vulnerabilidadnan. Na Hulanda, website gubernamental manera DigiD, MijnOverheid y Overheid.nl a keda desconecta temporalmente como precaucion. Esaki no ta nifica cu nan a sufri un atake cibernetico, sino cu autoridadnan a tuma medidanan preventivo pa proteha informacion.
Na Aruba, nos a ricibi informacion cu e websitenan manera Gobierno.aw, DOW.aw, ArubaChamber.com, AirportAruba.com, Elmar.aw, Parlamento.aw, Impuesto.aw y VNO Aruba tabata offline durante diaranson 21 di october. Sinembargo, ainda no tin confirmacion oficial cu e website localnan a keda desconecta debi n’e problema di PHP. Tampoco tin evidencia confirma cu nan a sufri atake cibernetico of robo di informacion.
E situacion a lanta preocupacion tocante siguridad digital di Aruba y necesidad di un organismo nacional specialisa den proteccion contra menasanan cibernetico. Autoridadnan ta enfrenta e desafio di mantene servicio esencial accesibel, mientras nan ta proteha informacion confidencial di ciudadano y empresanan.
Mientrastanto, ta importante cu institucionnan informa publico tocante causa di interupcion y medidanan adopta pa reestablece servicio di manera sigur.
Pa mas detaye lesa TREMPAN.
